Category Archives: ပြည်ပသတင်း

ဂူဂဲလ်က ဟွာဝေးကို ပေးထားတဲ့ ၀န်ဆောင်မှုတချို့နဲ့ အပလီကေးရှင်းတွေ ဖြတ်တောက်မယ်

နည်းပညာ ကုမ္ပဏီတစ်ခုဖြစ်တဲ့ ဂူဂဲလ် (Google) က ဟွာဝေး (Huawei) ဆက်သွယ်ရေး ကုမ္ပဏီကို ပေးထားတဲ့ မိုဘိုင်းဝန်ဆောင်မှု တစ်ချို့ကို ဖြတ်တောက် ပစ်တော့မယ်လို့ ကြေညာလိုက်ပါတယ်။

ဂူဂဲလ်ရဲ့ အခုလို ပြောဆိုမှုကြောင့် ဟွာဝေးဟာ ဂူဂဲရဲ့နည်းပညာ အထောက်အပံ့တွေ ဆုံးရှုံးမှာ ဖြစ်ပြီး ဟွာဝေးစမတ်ဖုန်း အသစ်တွေမှာလည်း သုံးစွဲသူတွေအတွက် ဂူဂဲရဲ့နာမည်ကျော် အပလီကေးရှင်းတွေနဲ့ ၀န်ဆောင်မှုတွေ ရရှိနိုင်တော့မှာ မဟုတ်ပါဘူး။

အမေရိကန်ကုမ္ပဏီတွေ အနေနဲ့ လိုင်စင် မရှိဘူးဆိုရင် ဟွာဝေး အပါအ၀င် ကုမ္ပဏီ တစ်ချို့ရဲ့ ပစ္စည်းတွေကို ၀ယ်ယူခွင့် မရှိဘူးဆိုတဲ့ အမိန့်တစ်ရပ်ကို အမေရိကန် အစိုးရက ထုတ်ပြန်အပြီးမှာ ဂူဂဲလ် ဘက်က အခုလို ကြေညာလိုက်တာပါ။

ဂူဂဲလ်ဘက်ကတော့ ကုမ္ပဏီဟာ အစိုးရရဲ့အမိန့်ကို လိုက်နာတဲ့ အနေနဲ့ အခုလို လုပ်ဆောင်မှာလို့ ပြောပါတယ်။
ဒီသတင်းနဲ့ ပတ်သက်လို့ ဟွာဝေးဘက်ကတော့ မှတ်ချက် တစ်စုံတရာ ပေးဖို့ ငြင်းဆိုထားပါတယ်။

ဟွာဝေးဟာ ဂူဂဲရဲ့ လုံခြုံရေးပိုင်းဆိုင်ရာ အဆင့်မြှင့်တင်မှုတွေနဲ့ နည်းပညာ အကူအညီတွေ ဆုံးရှုံးမှာ ဖြစ်ပြီး ဟွာဝေးက ထွက်သမျှ ဖုန်းအသစ်တွေမှာလည်း ယူကျူ့နဲ့ ဂူဂဲ မြေပုံ (Google Map) လိုမျိုး အပလီကေးရှင်းတွေ သုံးနိုင်တော့မှာ မဟုတ်ဘူးလို့ ဆိုပါတယ်။

ဒါပေမဲ့ ဟွာဝေးဟာ အန်းဒရိုက် လည်ပတ်မှု စနစ်ကိုတော့ လွတ်လပ်စွာ အသုံးပြုနိုင်တဲ့ ဗားရှင်း အနေနဲ့တော့ သုံးနိုင်ဦးမှာပဲ ဖြစ်ပါတယ်။

ဓာတ်ပုံ – Getty Images

သတင်းသမားတွေကို ပုပ်ရဟန်းမင်း ချီးကျူးဂုဏ်ပြု

■ ပုပ်ရဟန်းမင်းကြီး ဖရန်စစ်က သတင်းရယူရင်း သေဆုံးသွားရတဲ့ သတင်းသမားတွေကို ချီးကျူးဂုဏ်ပြုလိုက်ပြီး သတင်းလွတ်လပ်ခွင့်ဆိုတာ နိုင်ငံတစ်ခုရဲ့ကျန်းမာသန်စွမ်းမှုပြဆိုတဲ့ အဓိကအကျဆုံး ညွှန်းကိန်းဖြစ်ပါတယ်လို့ ပြောလိုက်ပါတယ်။
အီတလီနိုင်ငံမှာ စနေနေ့က ပြုလုပ်တဲ့ နိုင်ငံခြားသတင်းထောက်များ အစည်းအရုံးနဲ့ တွေ့ဆုံပွဲမှာ ပုပ်ရဟန်းမင်းကြီးက အခုလိုပြောကြားလိုက်တာပါ။ အာဏာရှင်တွေ ပထမဆုံး စတင်လုပ်ဆောင်တာဟာ သတင်းလွတ်လပ်ခွင့်ကို ဖယ်ရှားတာပဲဆိုတာကို မမေ့ကြပါနဲ့၊ ကျနော်တို့ဟာ နှိပ်စက်ညှင်းပန်းခံနေရသူ၊ ဖယ်ရှားခံနေရသူ၊ ခွဲခြားဆက်ဆံခံနေရသူ သားကောင်တွေဘက်က ရပ်တည်ရေးသားမယ့် သတင်းသမားတွေ လိုအပ်ပါတယ်လို့လည်း ပုပ်ရဟန်းမင်းကြီးက ပြောခဲ့ပါတယ်။

သတင်းသမားတွေဟာ သတင်းတု သတင်းမှားတွေကို ရှောင်ရှားနိုင်အောင် ကြိုးစားကြဖို့နဲ့ အတိဒုက္ခရောက်နေသူတွေ၊ အထူးသဖြင့် မြန်မာပြည်က ရိုဟင်ဂျာနဲ့ အီရတ်နိုင်ငံက ယာဇီဒီလူမျိုးတွေရဲ့သတင်းတွေကို ဆက်လက် ဖော်ထုတ်တင်ပြဖို့ တိုက်တွန်းလိုက်ပါတယ်။ ၂၀၁၇ ခုနှစ်အတွင်းက မြန်မာ့တပ်မတော်ရဲ့ နယ်မြေရှင်းလင်းမှုကြောင့် ဘင်္ဂလားဒေ့ရ်ှကို ထွက်ပြေးသွားတဲ့ ရိုဟင်ဂျာ တစ်သန်းနီးပါးနဲ့၊ အီရတ်နိုင်ငံထဲက IS အဖွဲ့ဝင်တွေ သေနတ်နဲ့ပစ်၊ ခေါင်းဖြတ်၊ အရှင်လတ်လတ် မီးရှို့သတ်ဖြတ်တာကိုခံခဲ့ရတဲ့ ယာဇီဒီလူမျိုး ကိုးထောင်လောက်ကို သူက ရည်ညွှန်းပြောဆိုခဲ့တာ ဖြစ်ပါတယ်။

Photo: VINCENZO PINTO / AFP

မိခင်စွန့်ပစ်တဲ့ ကလေး ခွေးကလေး က ကယ်တင်

■ ထိုင်းနိုင်ငံ အရှေ့မြောက်ပိုင်းမှာ မြေမြှုပ်ထားတဲ့ မွေးကင်းစ ကလေးငယ်တစ်ဦးကို တူးဖော်ကယ်ဆယ်ပေးခဲ့တဲ့ ပင်ပေါင် (Ping Pong) ဆိုတဲ့ ခွေးကလေးတစ်ကောင်ဟာ ခွေးသူရဲကောင်းအဖြစ် နာမည်ကျော်ကြားနေပါတယ်။

နတ်ခွန် ရတ်ချာစီမာ (Nakhon Ratchasima ) ပြည်နယ်၊ ချမ်ပေါင် (Chumpuang) ခရိုင်ထဲက လယ်ကွင်းတစ်ခုနားမှာ အဲဒီကလေးလေးကို ၁၅ နှစ်အရွယ် မိခင်က မေလ ၁၅ ရက်နေ့က မွေးပြီးပြီးချင်းမှာပဲ မြေမြှုပ်ခဲ့တာပါ။ ခွေးကလေး ‘ပင်ပေါင်’ ဟာ ကလေးမြှုပ်ထားတဲ့ အနားတဝိုက်ကို တူးဆွသလို နွားကျောင်းနေတဲ့ သူ့သခင်ကို ဟောင်ပြီးတော့ အသိပေးခဲ့ပါတယ်။
သခင်ဖြစ်သူက သွားကြည့်ရာမှာ အသက်မသေသေးတဲ့ ကျန်းမာသန်စွမ်းသူ ယောက်ျားလေးကို တွေ့ရပြီး ကလေးဟာ မြေမြှုပ်ခံထားရတာ သိပ်ကြာပုံမရသေးဘူးလို့ ဆိုပါတယ်။

ကလေးမိခင်ဟာ သူ့မိဘတွေသိရင် စိတ်ဆိုးမှာ ကြောက်ရွံ့တာကြောင့် ကလေးကို သူ့ဘာသာသူမွေးခဲ့ပြီး မွေးပြီးပြီးချင်းမှာပဲ မြေမြှုပ်ခဲ့တာလို့ ဆိုပါတယ်။ အဲဒီအမျိုးသမီးငယ်ကို လူသတ်ဖို့ အားထုတ်မှု၊ ကလေးစွန့်ပစ်မှုတို့နဲ့ တရားစွဲဆိုထားပါတယ်။ ဒေသတွင်းမီဒီယာတွေကတော့ ခွေးကလေး ‘ပင်ပေါင်’ ရဲ့ဆောင်ရွက်ချက်ကို ချီးကျူးရေးသားနေကြပါတယ်။

Photo: Khaosod via Twitter

IS တွေ ရခိုင်ကိုဝင်ရောက်ဖို့ မလေးရှားမှာ စခန်းချစီစဉ်

Malaysia မြေပုံ
Malaysia မြေပုံ

အိုင်အက်စ် အကြမ်းဖက်အဖွဲ့ဟာ အခုအခါမှာ စစ်သွေးကြွတွေ ဖိလစ်ပိုင်တောင်ပိုင်းနဲ့ မြန်မာနိုင်ငံ ရခိုင်ပြည်နယ်ကို ထိုးဖေါက် ဝင်ရောက်ဖို့အတွက် မလေးရှားနိုင်ငံ Sabah ပြည်နယ်က Tawau နဲ့ Sandakan ဒေသတွေကို စုရပ်အဖြစ် ရွေးချယ်ထားတယ်လို့ မလေးရှား ရဲမင်းကြီးTan Sri Mohamad Fuzi Harun က ကြာသပတေးနေ့မှာ ပြောကြားလိုက်ပါတယ်။

အီရတ် နဲ့ ဆီးရီးယားတို့မှာ မဟာမိတ်တပ်ဖွဲ့တွေကို မရှုမလှ ရှုံးနိမ့်ခဲ့တဲ့ အိုင်အက်စ် တွေဟာ သူတို့ရဲ့ လှုပ်ရှားမှု ဗဟိုအဖြစ် အရှေ့တောင်အာရှ ဘက်ကို ပိုပြီး ဦးလှည့်လာတယ်လို့လည်း ဆိုပါတယ်။

သူတို့ထဲမှာ မလေးရှားနိုင်ငံသားတွေ သာမက အင်ဒိုနီးရှားနိုင်ငံသားတွေနဲ့ တခြား အရှေ့တောင် အာရှ နိုင်ငံသားတွေလည်း ပါဝင်တယ်လို့ ဆိုပါတယ်။

အီရတ်နဲ့ ဆီးရီးယားမှာ အိုင်အက်စ်တို့ အရေးနိမ့်ပေမယ့် သူတို့ရဲ့ အကြမ်းဖက်မှု ဆုံးခန်းတိုင် သွားတာ မဟုတ်ပဲ သူတို့ လေ့ကျင့်ထားတဲ့ အကြမ်းဖက်သမားတွေဟာ ကမ္ဘာအနှံ့မှာ ရှိနေပြီး ငြိမ်းချမ်းရေးနဲ့ တည်ငြိမ်ရေးကို ခြိမ်းခြောက်နေတယ်လို့လည်း ရဲမင်းကြီးက သတင်းထောက်တွေကို ပြောခဲ့ပါတယ်။

ဥရောပ ဘက်မှာတော့ အိုင်အက်စ် စစ်သွေးကြွတွေဟာ Bosnia လို ဘော်လကန်ဒေသတွင်း နိုင်ငံတွေကို ပစ်မှတ်ထား နေကြတယ်လို့လည်း ပြောကြားခဲ့ပါတယ်။

ပါကစ္စတန် အကြမ်းဖက်တိုက်ဖျက်ရေး တာဝန်ခံ တဒါဇင်ကျော် အဖမ်းခံရ

ပါကစ္စတန် နိုင်ငံမှာ အကြမ်းဖက်မှု တန်ပြန်တိုက်ဖျက်ရေး တာဝန်ရှိသူ တဒါဇင်ကျော်ကို တနင်္ဂနွေနေ့က အစိုးရက ဖမ်းဆီးကြောင်း AP သတင်းက ဖော်ပြပါတယ်။ လူလတ်ပိုင်း ဇနီးမောင်နှံ နှစ်ဦး၊ သူတို့ရဲ့ ဆယ်ကျော်သက် အရွယ် သမီးနဲ့ မိသားစု မိတ်ဆွေတို့ကို အရာရှိတွေက သေနတ်နဲ့ ပစ်သတ်ခဲ့ပြီးနောက် တနေ့မှာဘဲ အခုလို ဖမ်းဆီးလိုက်တာ ဖြစ်ပါတယ်။ အရာရှိတွေကတော့ အစ္စလာမ္မစ် အစွန်းရောက် IS စစ်သွေးကြွတွေနဲ့ ပစ်ခတ်မှုလို့ ပြောဆိုခဲ့ကြတာပါ။

ဒါပေမယ့်လည်း မျက်မြင်တွေ့သူတွေနဲ့ ဆွေမျိုးတွေကတော့ သေနတ်နဲ့ သွေးအေးအေး ပစ်သတ်ခံခဲ့ရတာလို့ ပြောဆိုထားပါတယ်။ Sahiwal မြို့မှာ ဆွေမျိုးတွေက နေရာက ဖယ်မပေးဘဲ ဆန္ဒပြကြပြီး သေဆုံးသူတွေရဲ့ ရုပ်အလောင်းတွေကို အာဏာပိုင်တွေကို ဖယ်ရှားခွင့် မပြုခဲ့ဘူးလို့လည်း ပါကစ္စတန် သတင်းစာ Dawn က ဖော်ပြပါတယ်။ မင်္ဂလာဆောင်ပွဲ တခုကို တက်ဖို့ အသွားမှာ ရဲတွေက ပစ်ခတ်ခဲ့တာလို့ ကျန်ဖြစ်သူ သားဖြစ်သူက ပြောဆိုတာကို Dawn သတင်းစာရဲ့ ဖော်ပြထားပြီး ပါကစ္စတန် ရုပ်သံကလည်း သားဖြစ်သူရဲ့ ဗီဒီယိုကို ထုတ်လွှင့်ခဲ့ပါတယ်။

ကားထဲမှာလည်း ဘာလက်နက်မှ မပါဘူးလို့ သားဖြစ်သူက ပြောပါတယ်။ ကားထဲကနေ သေနတ်နဲ့ ပစ်ခတ်ခဲ့တာ မရှိဘူးလို့လည်း မျက်မြင်တွေရဲ့ အတည်ပြု ပြောဆိုချက်ကို Dawn သတင်းမှာ ဖော်ပြပါတယ်။ အကြမ်းဖက်မှု တန်ပြန်နှိမ်နင်းရေး ရဲတပ်ဖွဲ့ အနေနဲ့ အကြမ်းဖက်ဝါဒ တိုက်ဖျက်ရေးမှာ စွမ်းစွမ်းတမံ ဆောင်ရွက်ခဲ့သလိုဘဲ လူတိုင်းဟာလည်း တရားဥပဒေကို လိုက်နာကြရမှာ ဖြစ်တယ်လို့ ၀န်ကြီးချုပ် Imran Khan က တွစ်တာမှာ ရေးသားပါတယ်။

မိဘတွေ ပစ်ခတ်သတ်ဖြတ်ခံရတာကို မျက်မြင်တွေ့ခဲ့ရတဲ့ ကလေးတွေကို တွေ့ရတဲ့ အတွက်လည်း တုန်လှုပ်ခြောက်ခြားရကြောင်း၊ ဒီကလေးတွေကို နိုင်ငံက တာဝန်ရှိတဲ့ အတိုင်း အပြည့်အ၀ စောင့်ရှောက်သွားမယ်လို့ ၀န်ကြီးချုပ်က ရေးသားခဲ့ပါတယ်။ ပစ်ခတ်ခံခဲ့ရတဲ့ မိသားစု အတွင်းက သမီးငယ် နှစ်ဦးလည်း အသက်ရှင် လွတ်မြောက်ခဲ့ပါတယ်။

ရုရှားစစ်ထောက်လှမ်းရေး အကြီးအကဲကို EU အရေးယူဒဏ်ခတ်

ရုရှားစစ်ထောက်လှမ်းရေးဌာန GRU အကြီးအကဲအပါအဝင် ရုရှားနဲ့ ဆီးရီးယားတာဝန်ရှိသူ ၉ ယောက်ကို EU ဥရောပသမဂ္ဂက အရေးယူဒဏ်ခတ်မှုတွေ ချမှတ်လိုက်ပါတယ်။ ဓါတုလက်နက်ဆိုင်ရာ အရေးယူဒဏ်ခတ်မှုတွေကို EU က အခုပထမဆုံး လုပ်လိုက်တာဖြစ်ပါတယ်။

ရုရှားသူလျှိုဟောင်း Sergei Skripal နဲ့သူ့သမီးတို့ကို ဗြိတိန်နိုင်ငံမှာ ဓါတုအဆိပ်သုံး သတ်ဖို့ကြိုးစားခဲ့မှုမှာ ဓါတုလက်နက်ပိုင်ဆိုင်၊ ပို့ဆောင် အသုံးပြုမှုတို့နဲ့ GRU အကြီးအကဲ၊ ဒုအကြီးအကဲနဲ့ တာဝန်ရှိသူ ၂ ယောက်ကို ခရီးသွားလာ ကန့်သတ်တာ ပိုင်ဆိုင်မှုတွေ ထိန်းချုပ်တာ ပါဝင်တဲ့ ဒဏ်ခတ်အရေးယူမှုတွေကို ချမှတ်တယ်လို့ EU နိုင်ငံခြားရေးဝန်ကြီးတွေရဲ့ ကြေညာချက်ထဲမှာ ဖော်ပြထားပါတယ်။

ဓါတုလက်နက်နဲ့ တိုက်ခိုက်မှုကြောင့် ဆီးရီးယားအပေါ် အရေးယူမှုမှာတော့ ဆီးရီးယားမှာ ဓါတုလက်နက်စမ်းသပ် ထုတ်လုပ်မှုနဲ့ပါတ်သက်နေတဲ့ လုပ်ငန်းတွေနဲ့ ဆီးရီးယားတာဝန်ရှိသူ ၅ ယောက်ကို ကန့်သတ်ချက်တွေချလိုက်ပါတယ်။ Sergei Skripal နဲ့သမီးဖြစ်သူတို့ ဓါတုအဆိပ်နဲ့သတ်ဖို့ကြိုးစားမှုဟာ သူ့တို့လက်ချက်မဟုတ်ဘူးလို့ ရုရှားကတော့ ငြင်းဆန်ထားပါတယ်။

မာလီတိုက်ခိုက်မှု ကုလငြိမ်းချမ်းရေးထိန်း တပ်သား ၁၀ ဦး သေဆုံး

မာလီနိုင်ငံ မြောက်ပိုင်းက ကုလသမဂ္ဂ ငြိမ်းချမ်းရေးထိန်း စခန်းတခုကို ဘယ်သူတွေမှန်း မသိရတဲ့ သေနတ်သမားတွေက တိုက်ခိုက်ခဲ့တာမှာ ချဒ်နိုင်ငံက ကုလ ငြိမ်းချမ်းရေးထိန်း တပ်ဖွဲ့ဝင် ၁၀ ဦး သေဆုံးပြီး ၂၅ ဦး ဒဏ်ရာရခဲ့ပါတယ်။

ဒီတိုက်ခိုက်မှုက စစ်ရာဇ၀တ်မှု ဖြစ်နိုင်ခြေ ရှိတယ်လို့ ကုလသမဂ္ဂ အတွင်းရေးမှူးချုပ် Antonio Guterres က ပြောဆိုပြီး ရှုတ်ချပါတယ်။ ချဒ် အစိုးရနဲ့ သေဆုံးရသူတွေရဲ့ မိသားစုတွေနဲ့ ထပ်တူ ၀မ်းနည်းကြေကွဲရပါကြောင်း ကုလအတွင်းရေးမှူးချုပ် Guterres က သတင်းစကား ပြောဆိုတဲ့ အကြောင်း ပြောခွင့်ရက ပြောပါတယ်။

အန္တရာယ်ကြားမှာ ဒုက္ခခံပြီး တာဝန်ထမ်းဆောင်နေကြတဲ့ အမျိုးသားတွေ အမျိုးသမီးတွေရဲ့ ရဲစွမ်းသတ္တိနဲ့ နှစ်မြုပ် ဆောင်ရွက်မှုတွေ အတွက်လည်း ဂုဏ်ပြုတဲ့ အကြောင်း ကုလ အတွင်းရေးမှူးချုပ်က ပြောဆိုခဲ့ပါတယ်။

မာလီနိုင်ငံ Kidal ဒေသက Aguelhok မှာ ရှိတဲ့ ကုလသမဂ္ဂ ငြိမ်းချမ်းရေးထိန်း စခန်းကို သေနတ်သမားတွေက လက်နက်တပ်ဆင်ထားတဲ့ ကားတွေနဲ့ ရောက်ရှိလာပြီးနောက် အလစ်ဝင် တိုက်ခိုက်ခဲ့တာ ဖြစ်ပါတယ်။ တိုက်ခိုက်သူတွေကို ကုလ တပ်ဖွဲ့တွေက ခုခံတိုက်ခိုက်ခဲ့ပေမယ့်လည်း ငြိမ်းချမ်းရေးထိန်း တပ်ဖွဲ့ဝင် ၁၀ ဦး သေဆုံးခဲ့ရပြီး ၂၅ ဦး ဒဏ်ရာရခဲ့ပါတယ်။ တိုက်ခိုက်မှုက ဘယ်သူ့လက်ချက် ဆိုတာ မသိရသလို တိုက်ခိုက်ခဲ့သူတွေဘက်က သေဆုံးသူ အရေအတွက်ကိုလည်း မသိရပါဘူး။

ကမ္ဘာ့ အသက်အကြီးဆုံး ဂျပန်အဖိုးအို ကွယ်လွန်

ဂျပန်နိုင်ငံမြောက်ပိုင်း ဟော့ကိုင်းဒိုးကျွန်းက အာရှို့ရိုး Ashoro မြို့မှာနေထိုင်တဲ့ ဂျပန်အဖိုးအို မာဆဇို့-နိုမက Masazo Nomaka ဟာ အိပ်ပျော်နေစဉ် တနင်္ဂနွေမနက် အစောပိုင်း ၊ အသက် ၁၁၃ နှစ်အရွယ်မှာ ကွယ်လွန်သွားတယ်လို့ မိသားစုဝင်တွေက ပြောပါတယ်။ သူဟာ ကမ္ဘာ့အသက်အကြီးဆုံး အမျိုးသားတဦး ဖြစ်ပါတယ်။

သူ့မြေးမဖြစ်သူ Yuko က သူ့အဖိုးဟာ မကွယ်လွန်ခင်အထိ ကျန်းကျန်းမာမာနဲ့ ပုံမှန်ရှိနေပြီး မိသားစုအတွက် ဘာဒုက္ခမှ ပေးခဲ့တာမရှိဘူးလို့ ဆိုပါတယ်။ ကမ္ဘာကျော်သိပ္ပံပညာရှင် အိုင်းစတိုင်းရဲ့ Relativity theory ကို မထုတ်ပြန်ခင် လပိုင်းအလို ၁၉၀၅ ခုနှစ်မှာ မစ္စတာ Nomaka ကို မွေးဖွားခဲ့တာပါ။

Nomaka ရဲ့မိသားစုဟာ ရေနွေးစိမ်တဲ့ ဂျပန်ရိုးရာ ရေပူစမ်းလုပ်ငန်းကို မျိုးဆက်ပေါင်း ၄ ခုအထိ လုပ်ကိုင်လာခဲ့ပြီး အခုချိန်ထိလည်း လုပ်ကိုင်နေဆဲ ဖြစ်ပါတယ်။ ၁၉၀၄ နှစ်မှာမွေးဖွားတဲ့ အသက် ၁၁၄ နှစ်အရွယ် စပိန်နိုင်ငံသား Spaniard Francisco Nunez Olivera မနှစ်က သေဆုံးသွားတဲ့နောက်မှာ Nomaka ကို ကမ္ဘာ့ Guinness စံချိန်ဝင်သူအဖြစ် မှတ်တမ်းတင်ခဲ့ပါတယ်။ 

ဂျပန်နိုင်ငံဟာ ကမ္ဘာပေါ်မှာ အသက်ရှည်တဲ့ အဖိုးအဖွား အများစုရှိရာ တိုင်းပြည်ဖြစ်ပါတယ်။ Jiroemon Kimura ဂျီရိုး-အဲ့မွန်း-ခိမုရာ ဆိုတဲ့အဖွားအိုဟာ အသက် ၁၁၆ နှစ်အရွယ် ၂၀၁၃ ဂျွန်လက ကွယ်လွန်ခဲ့ပါတယ်။

ပလက်ဝမှာ AA နဲ့ အစိုးရတပ် တိုက်ပွဲဖြစ်

ခိုင်နဲ့ ချင်းပြည်နယ်အစပ် ပလက်ဝမြို့နယ် တရာအိုင်ရွာရဲ့ အနောက်မြောက်ဘက်မှာ တပ်မတော်နဲ့ AA ရက္ခိုင့်တပ်မတော်တို့ မနေ့က ဇန်နဝါရီလ ၁၉ ရက်နေ့က တိုက်ပွဲဖြစ်ပွားခဲ့ကြတယ်လို့ သိရပါတယ်။

မနေ့က နေ့လယ်ပိုင်းမှာ ရှင်မလိန်ရွာနဲ့ တရာအိုင်ရွာအကြားမှာ တိုက်ပွဲဖြစ်ကြတာလို့ AA သတင်းပြန်ကြားရေး တာဝန်ခံ ခိုင်သုခက ပြောပါတယ်။

ပြီးခဲ့တဲ့ ဇန်နဝါရီလ ၁၆ ရက်နေ့ကနေ ၁၈ ရက်နေ့အထိ ထိတွေ့တိုက်ပွဲဖြစ်ပွားတာ မရှိခဲ့ဘဲ မနေ့ကမှ ပြန်လည်ဖြစ်ပွားခဲ့ကြတာလို့ ပြောပါတယ်။

နှစ်ဖက်ထိခိုက်ကျဆုံးမှု အသေးစိတ်အခြေအနေကိုတော့ မသိရသေးပါဘူး။  မနေ့က တိုက်ပွဲဖြစ်ပွားမှု အခြေအနေနဲ့ပတ်သက်လို့ တပ်မတော် သတင်းမှန်ပြန်ကြားရေးအဖွဲ့က ဗိုလ်မှူးချုပ် ဇော်မင်းထွန်းနဲ့ အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီး ၀င်းဇော်ဦးကို ဆက်သွယ်ပေမယ့် ဆက်သွယ်လို့ မရခဲ့ပါဘူး။

တပ်မတော်နဲ့ AA ရက္ခိုင့်တပ်မတော်တို့ တိုက်ပွဲတွေဖြစ်ပွားနေတာ ပြီးခဲ့တဲ့ ဒီဇင်ဘာလ ကတည်းကဖြစ်ပြီး နှစ်လနီးပါးကြာမြင့်နေပြီဖြစ်ပါတယ်။

တိုက်ပွဲတွေကြောင့် နေရပ်စွန့်ခွာ ထွက်ပြေးနေရသူ စုစုပေါင်း ၆ ထောင်လောက်ရှိနေပြီး အတော်များများဟာ သူတို့နေရပ်ဆီ မပြန်နိုင်သေးဘူးလို့ သိရပါတယ်။

ကန်အစိုးရအသုံးစရိတ်နဲ့ နယ်စပ်လုံခြုံရေးရန်ပုံငွေကိစ္စ သမ္မတထရမ့် မိန့်ခွန်းပြောမည်

အမေရိကန်ပြည်ထောင်စုမှာ အစိုးရယန္တရားတစိတ်တပိုင်း ရပ်ထားရတဲ့ကိစ္စနဲ့ နယ်စပ်လုံခြုံရေးကိစ္စတို့နဲ့ ပတ်သက်ပြီး ဒီကနေ့ စနေနေ့မှာ အရေးကြီးတဲ့ကြေညာချက်ထုတ်မယ်လို့ အမေရိကန်သမ္မတ Donald Trump က ပြောပါတယ်။

ဒေသစံတော်ချိန် ညနေ ၃ နာရီမှာ အိမ်ဖြူတော်ကနေ သမ္မတ Trump မိန့်ခွန်းပြောမှာဖြစ်ပြီး သူ့အဆို တောင်ပိုင်းနယ်စပ်က လူသားချင်းစာနာမှုနဲ့ ဆက်နွယ်တဲ့ ပဋိပက္ခနဲ့ ပတ်သက်ပြီး ပြောကြားမယ်၊ တောင်ပိုင်း နယ်စပ်ကို လုံခြုံအောင်မထားနိုင်ဘူးဆိုရင် တို့တွေဟာ သိပ်ကိုဉာဏ်နည်းတဲ့ သနားစရာသတ္တဝါတွေပဲလို့ သမ္မတက ပြောပါတယ်။

အရီဇိုးနားပြည်နယ် သဲကန္တာရမှာ တဘက်နိုင်ငံက တရားမဝင်လာရောက်သူ ၃၇၆ ဦး အမေရိကန်နယ်စပ် ဂိတ်ကို ခြေလျင်ခရီးနဲ့ရောက်လာပြီး အဲဒီမှာ နယ်စပ်ဝင်ခွင့်ရဖို့ တန်းစီနေကြတဲ့ ဗွီဒီယို ၂ ခုကို Twitter လူမှု ကွန်ယက်စာမျက်နှာမှာ တင်လိုက်ပါတယ်။ သူတို့တွေ အားလုံးနီးပါးက မိသားစုလိုက်လာကြတာတွေ၊ လူကြီး မပါတဲ့ အသက်မပြည့်ကလေးတွေ ဖြစ်တယ်လို့လည်း ရေးထားပါတယ်။

ဒီမိုကရက်နဲ့ ရီပတ်ပလစ်ကန် ပါတီတို့အကြား ဒီနယ်စပ်တံတိုင်းကာရေးကိစ္စ သဘောတူညီချက်မရလို့ အမေရိကန်အစိုးရလုပ်ငန်းတချို့ ရပ်နားထားရတာ စနေနေ့မှာ ၂၉ ရက် ပြည့်သွားပြီ ဖြစ်ပါတယ်။ သမ္မတက တံတိုင်းဆောက်ရေး ဒေါ်လာ သန်းပေါင်း ငါးထောင့်ခုနှစ်ရာ တောင်းထားပြီး ဒီမိုကရက်တို့ကတော့ နယ်စပ်လုံခြုံရေးအတွက် ဒေါ်လာသန်း တထောင်ပေးမယ်လို့ပဲ ပြောထားတာပါ။