Category Archives: ပြည်ပသတင်း

အကျဉ်းကျ အင်ဒိုနီးရှားအစွန်းရောက် ဘာသာရေးခေါင်းဆောင် Abu B. Baker လျှော့ရက်နဲ့လွတ်

အင်ဒိုနီးရှားနိုင်ငံက ဘာလီဗုံးခွဲသူတွေ နဲ့ တခြားစစ်သွေးကြွတွေ ယုံကြည်လေးစားတဲ့ အစ္စလာမ်ဘာသာရေး ခေါင်းဆောင် Abu Bakar Bashir ကို အင်ဒိုနီးရှားနိုင်ငံက ပြန်လွှတ်ပေးလိုက်ပါတယ်။ သူ့ရဲ့ အစွန်းရောက် အယူအဆတွေကို စွန့်လွှတ်မယ်ဆိုတဲ့ အချက်ကြောင့် အင်ဒိုနီးရှားသမ္မတ ဂျိုကိုဝီဒိုဒိုက သူ့ကို ထောင်ဒဏ် ၁၅ နှစ် ချမှတ်ထားတာကိုလျှော့ပြီး ပြန်လွှတ်ပေးလိုက်တာဖြစ်တယ်လို့ သူရဲ့ရှေ့နေတွေက ဒီကနေ့မှာ အတည်ပြု ပြောကြားလိုက်ပါတယ်။

အစိုးရအာဏာပိုင်တွေအနေနဲ့ ဘာသာရေးကင်းလွတ်ရမယ်ဆိုတဲ့အယူအဆအပေါ်မှာ သူဘက်က လက်ခံဖို့ ငြင်းဆန်နေတာကြောင့် သူ့ကို အရင်ကတော့ ပြစ်ဒဏ်ကနေ လွှတ်ပေးလို့ မရခဲ့ပါဘူး။ Abu Bakar Bashir က သူသာလျှင် ဘုရားသခင် နဲ့ ပြန်လည် ဖြေဆိုနိုင်တဲ့သူ တဦးတည်းဖြစ်ပြီး၊ အင်ဒိုနီးရှားနိုင်ငံအနေနဲ့လည်း အစ္စလာမ်မစ်ဥပဒေ နဲ့ အုပ်ချုပ်သင့်တယ်လို့ အခိုင်အမာ ပြောကြားခဲ့တာဖြစ်ပါတယ်။

အင်ဒိုနီးရှားနိုင်ငံမှာ လာမယ့် ဧပြီလမှာကျင်းပမယ့် သမ္မတရွေးကောက်ပွဲအတွက် မဲဆွယ်စည်းရုံးတာတွေ လုပ်လာနေချိန်မှာပဲ အခုလိုမျိုး သူ့ကို လွှတ်ပေးလိုက်တာဖြစ်ပါတယ်။ သမ္မတဝီဒိုဒိုနဲ့ အပြိုင် ရွေးချယ်ခံမယ့် အတိုက်အခံခေါင်းဆောင်တွေက Bashir ဟာ အစ္စလာမ်ဘာသာဝင်စစ်စစ် မဟုတ်ဘူးလို့ သိက္ခာချ တိုက်ခိုက် ပြောဆိုနေတာဖြစ်ပါတယ်။

အစ္စလာမ်မစ်နိုင်ငံရေးပါတီဥက္ကဋ္ဌ နဲ့ သမ္မတဝီဒိုဒိုရဲ့ ရွေးကောက်ပွဲအောင်နိုင်ရေး အကြံပေးဖြစ်တဲ့ ရှေ့နေ Yusril Mahendra ကတော့ သူ့အနေနဲ့ Bashir ကို ထောင်ဒဏ်ချမှတ်ထားတာနဲ့ ပတ်သက်ပြီး သမ္မတ ဝီဒိုဒိုဆီကို တင်ပြခဲ့တယ်လို့ ဒီကနေ့ ပြုလုပ်တဲ့ သတင်းစာရှင်းလင်းပွဲ ပြောကြားလိုက်ပါတယ်။

မက္ကဆီကိုအလယ်ပိုင်း ရေနံပိုက်လိုင်း ပေါက်ကွဲမှု လူ ၂၀ သေဆုံး

မက္ကဆီကိုနိုင်ငံအလယ်ပိုင်းမှာ သောကြာနေ့တုန်းက ယိုစိမ့်နေတဲ့ ရေနံပိုက်လိုင်းပေါက်ကွဲခဲ့ တာကြောင့် လူ ၂၀ သေဆုံးပြီး ၆၀ ထက်မနည်း ဒဏ်ရာ အပြင်းအထန်ရသွားခဲ့ပါတယ်။

Hidalgo ပြည်နယ်က ရေနံပိုက်လိုင်းကနေ ရေနံတွေကို တရားမဝင်ခိုးယူနေတဲ့ သူတွေကြောင့် ပိုက်လိုင်း ယို စိမ့်တာနဲ့ ပေါက်ကွဲမှုဖြစ်ပွားခဲ့တာဖြစ်တယ်လို့ မက္ကဆီကို အာဏာပိုင်တွေက ပြောပါတယ်။ ပေါက်ကွဲမှုမဖြစ်ပွား ခင်မှာ ရေနံဆီတွေ လေထဲကို ပန်းထွက်သွားပြီးတော့ လူတွေက အဲဒီရေနံဆီတွေကို ရေပုံးတွေ၊ အမှိုက်ပုံးတွေနဲ့ တခြား ပုံးတွေနဲ့ လိုက်ခံနေကြတယ်လို့ ဗွီဒီယိုတွေမှာ ပြနေပါတယ်။

Hidalgo ပြည်နယ် အုပ်ချုပ်ရေးမှူး Omar Fayad ကတော့ အဲဒီမှာနေထိုင်နေကြတဲ့သူတွေ အနေနဲ့ ရေနံခိုးယူမှု မှာ မပါဝင်ကြဖို့ တိုက်တွန်းလိုက်ပြီး ဒီလိုခိုးယူတာတွေဟာ တရားမဝင်တဲ့အပြင် ကိုယ်ရဲ့အသက်ကိုရော၊ မိသားစုအတွက်ပါ အန္တရာယ်ဖြစ်စေတယ်လို့ ပြောကြားလိုက်ပါတယ်။

မက္ကဆီကိုသမ္မတ Andres Manuel Lopez Obrador ကတော့ အစိုးရအနေနဲ့ ဒီပေါက်ကွဲမှုဖြစ်တဲ့နေရာက လူတွေကို အကူအညီတွေပေးဖို့ပြောလိုက်ပါတယ်။ လောင်စာဆီခိုးယူမှုတွေကြောင့် မက္ကဆီကိုအစိုးရအနေနဲ့ တနှစ်ကို အမေရိကန်ဒေါ်လာ ၃ ဘီလီယံလောက်ဆုံးရှုံးရတယ်လို့လည်း အစိုးရက ပြောကြားလိုက်ပါတယ်။

ကန်အစိုးရအသုံးစရိတ်နဲ့ နယ်စပ်လုံခြုံရေးရန်ပုံငွေကိစ္စ သမ္မတထရမ့် မိန့်ခွန်းပြောမည်

အမေရိကန်ပြည်ထောင်စုမှာ အစိုးရယန္တရားတစိတ်တပိုင်း ရပ်ထားရတဲ့ကိစ္စနဲ့ နယ်စပ်လုံခြုံရေးကိစ္စတို့နဲ့ ပတ်သက်ပြီး ဒီကနေ့ စနေနေ့မှာ အရေးကြီးတဲ့ကြေညာချက်ထုတ်မယ်လို့ အမေရိကန်သမ္မတ Donald Trump က ပြောပါတယ်။

ဒေသစံတော်ချိန် ညနေ ၃ နာရီမှာ အိမ်ဖြူတော်ကနေ သမ္မတ Trump မိန့်ခွန်းပြောမှာဖြစ်ပြီး သူ့အဆို တောင်ပိုင်းနယ်စပ်က လူသားချင်းစာနာမှုနဲ့ ဆက်နွယ်တဲ့ ပဋိပက္ခနဲ့ ပတ်သက်ပြီး ပြောကြားမယ်၊ တောင်ပိုင်း နယ်စပ်ကို လုံခြုံအောင်မထားနိုင်ဘူးဆိုရင် တို့တွေဟာ သိပ်ကိုဉာဏ်နည်းတဲ့ သနားစရာသတ္တဝါတွေပဲလို့ သမ္မတက ပြောပါတယ်။

အရီဇိုးနားပြည်နယ် သဲကန္တာရမှာ တဘက်နိုင်ငံက တရားမဝင်လာရောက်သူ ၃၇၆ ဦး အမေရိကန်နယ်စပ် ဂိတ်ကို ခြေလျင်ခရီးနဲ့ရောက်လာပြီး အဲဒီမှာ နယ်စပ်ဝင်ခွင့်ရဖို့ တန်းစီနေကြတဲ့ ဗွီဒီယို ၂ ခုကို Twitter လူမှု ကွန်ယက်စာမျက်နှာမှာ တင်လိုက်ပါတယ်။ သူတို့တွေ အားလုံးနီးပါးက မိသားစုလိုက်လာကြတာတွေ၊ လူကြီး မပါတဲ့ အသက်မပြည့်ကလေးတွေ ဖြစ်တယ်လို့လည်း ရေးထားပါတယ်။

ဒီမိုကရက်နဲ့ ရီပတ်ပလစ်ကန် ပါတီတို့အကြား ဒီနယ်စပ်တံတိုင်းကာရေးကိစ္စ သဘောတူညီချက်မရလို့ အမေရိကန်အစိုးရလုပ်ငန်းတချို့ ရပ်နားထားရတာ စနေနေ့မှာ ၂၉ ရက် ပြည့်သွားပြီ ဖြစ်ပါတယ်။ သမ္မတက တံတိုင်းဆောက်ရေး ဒေါ်လာ သန်းပေါင်း ငါးထောင့်ခုနှစ်ရာ တောင်းထားပြီး ဒီမိုကရက်တို့ကတော့ နယ်စပ်လုံခြုံရေးအတွက် ဒေါ်လာသန်း တထောင်ပေးမယ်လို့ပဲ ပြောထားတာပါ။

တောင်ကိုရီးယားနိုင်ငံဟာ ကမ္ဘာမှာ ကလေးမွေးဖွားမှုနှုန်းအနိမ့်ဆုံးနိုင်ငံအဖြစ် မှတ်တမ်းတင်ခံရ

တောင်ကိုရီးယားနိုင်ငံမှာ ကလေးမွေးကြဖို့ အစိုးရက တိုက်တွန်းနေပေမယ့် ကမ္ဘာမှာ ကလေးမွေးဖွားမှုနှုန်း အနိမ့်ဆုံးနိုင်ငံတခုအဖြစ် ဆက်လက်ရှိနေပါတယ်။

အာရှမှာ စတုတ္ထစီးပွားရေးအင်အား အကြီးဆုံးနိုင်ငံဖြစ်တဲ့တောင်ကိုရီးယားနိုင်ငံက ကလေးမွေးနှုန်း ပုံမှန် ဖြစ်အောင် အမျိုးသမီးတယောက်ရဲ့သက်တမ်းမှာ အနည်းဆုံး ကလေး ၂ ယောက်လောက် မွေးကြအောင် ရည်မှန်းထားတာပါ။ ဒါပေမဲ့ ၂၀၁၈ တတိယလေးလပတ်မှာ ကလေးတယောက်နှုန်းတောင် မမွေးကြဘူးလို့ လူဦးရေစာရင်းကောက်ခံတဲ့ပညာရှင်တွေက ပြောပါတယ်။ အခုနှုန်းဟာ ၂၀၀၁ ခုနှစ်ကတည်းကဆိုရင် စံချိန်တက် အနိမ့်ဆုံးဖြစ်ပါတယ်။ ဒီအခြေအနေဟာ အတော်လေးစိုးရိမ်စရာဖြစ်တယ်လို့ Seoul မြို့တော်က အမျိုးသမီးတက္ကသိုလ်ပါမောက္ခ Dr. Jung Jae-hoon ကပြောပါတယ်။

တခြား OECD နိုင်ငံတွေရဲ့ မွေးဖွားနှုန်းနဲ့ယှဉ်ရင် တောင်ကိုရီးယားနိုင်ငံရဲ့ အမျိုးသမီးတယောက်မှာ မွေးဖွား နှုန်းက ၁ ယောက်ကျော်လောက်နည်းနေတယ်လို့ ပါမောက္ခ Jung ကပြောပါတယ်။ ကလေးစရိတ်ကြီးမြင့်တာ၊ နေ့ကလေးထိန်းကျောင်းထားဖို့ အခက်အခဲရှိတာ၊ အလုပ်ချိန်တွေများတာ စတဲ့အခြေအနေတွေကြောင့် အမျိုးသမီးတွေ ကလေးသိပ်မမွေးကြတော့တာဖြစ်ပါတယ်။

ကလေးမွေးဖွားနှုန်းတက်လာအောင် တောင်ကိုရီးယားအစိုးရက ပြီးခဲ့တဲ့ ၁၃ နှစ်အတွင်း ဒေါ်လာ ၁၂၁ ဘီလီယံ သုံးစွဲခဲ့ပေမဲ့ အောင်မြင်ပုံမရပါဘူး။ ဒီနှုန်းနဲ့ဆိုရင် တောင်ကိုရီးယား လူဦးရေဟာ ၂၀၁၇ ခုနှစ်မှာ စတင် ကျဆင်းလိမ့်မယ်လို့ ကျယ်ကျယ်ပြန့်ပြန့် ခန့်မှန်းထားကြပါတယ်။

ရုရှားနဲ့ပတ်သက်မှု လွှတ်တော်မှာလိမ်လည်ထွက်ဆိုဖို့ သမ္မတထရမ့်ညွှန်ကြားခဲ့ဟု သူ့ရှေ့နေ Cohen ဆို


ရုရှားနိုင်ငံ၊ မော်စကိုမြို့တော်မှာ Trump Tower အဆောက်အဦး ဆောက်လုပ်ဖို့ ကြိုးပမ်းခဲ့တာတွေကို လွှတ်တော်မှာ လိမ်လည်ထွက်ဆိုဖို့ သမ္မတ Donald Trump က သူ့ရှေ့နေကို ညွှန်ကြားခဲ့ကြောင်း သတင်းတွေ ထွက်ပေါ်လာပါတယ်။

သမ္မတနဲ့ သူ့ရဲ့ရှေ့နေဟောင်း Michael Cohen တို့အကြောင်း ဖော်ပြထားတဲ့ သတင်း ကိုတော့ အမည်မဖော် လိုတဲ့ ပြည်ထောင်စုအစိုးရ တရားဥပဒေစိုးမိုးရေး အရာရှိ ၂ ဦးကို ကိုးကားပြီး BuzzFeed သတင်းဌာနက မနေ့ နှောင်းပိုင်းမှာ ဖော်ပြခဲ့တာပါ။ ရုရှားနဲ့ ပတ်သက်တာတွေကို လွှတ်တော်မှာ လိမ်လည်ထွက်ဆိုဖို့ သမ္မတက ညွှန်ကြားခဲ့ကြောင်း အထူးစုံစမ်းစစ်ဆေးရေးမှူး Robert Mueller ကို ရှေ့နေ Cohen က ပြောခဲ့တယ် လို့လည်း ကိုးကား ရေးသားထားပါတယ်။

သတင်းမှာကိုးကားဖော်ပြခဲ့သူ လုံခြုံရေးအရာရှိ ၂ ဦးဟာ အမှုကိုစုံစမ်းစစ်ဆေးရာမှာ ပါဝင်သူတွေ ဖြစ်ကြောင်း လည်း သတင်းက ဖော်ပြခဲ့တာပါ။ Trump နဲ့အတူ ဆောက် လုပ်ရေး စီမံကိန်းကို ကြီးကြပ်ဖို့ တာဝန်ပေးထားတဲ့ သမီး Ivanka နဲ့ သားဖြစ်သူ Donald, Jr. တို့ကိုလည်း ရှေ့နေ Cohen က အိမ်ခြံမြေလုပ်ငန်းနဲ့ ပတ်သက်တဲ့ နောက်ဆုံးအခြေအနေ အသေးစိတ်ကို ပုံမှန်အစီရင်ခံခဲ့ရတယ်လို့လည်း သတင်းကရေးပါတယ်။

တချိန်တည်းမှာပဲ ရုရှားနဲ့ စေ့စပ်ညှိနှိုင်းနေတဲ့ သတင်းအချက်အလက်တွေကိုလည်း ရှေ့နေ Cohen က အစီရင်ခံရတယ်လို့ ဆိုပါတယ်။ သမ္မတရွေးကောက်ပွဲမှာ အနိုင်ရခဲ့တဲ့ သမ္မတ Trump ကတော့ ရုရှားနဲ့ အပေးအယူလုပ်တာ ဘာတခုမှမရှိတဲ့အကြောင်း ပြော ဆိုထားတာပါ။ ရုရှားနဲ့ ပတ်သက်ခဲ့တာတွေကို လွှတ်တော်ရေးရာ ကော်မတီ ရှေ့မှောက် မှာ လိမ်လည် ဖုံးဖိဖို့ ကြိုးစားခဲ့တယ်ဆိုတဲ့ စွပ်စွဲချက်ဟာ အကြီးမားဆုံး စွပ်စွဲချက်တခု ဖြစ်တဲ့အတွက် မှန်-မမှန်ဆိုတာ ဖော်ထုတ်နိုင်အောင် လိုအပ်သလို ဆောင်ရွက်သွားမှာ ဖြစ်ကြောင်းလည်း အောက်လွှတ်တော် ထောက်လှမ်းရေး ကော်မတီဝင် ဒီမိုကရက်အမတ် Adam Schiff က Twitter လူမှုကွန်ရက်ကနေ ပြောဆိုခဲ့ပါတယ်။

တက္ကဆက်ပြည်နယ် ကိုယ်စားပြု အောက်လွှတ်တော်အမတ် Joaquin Castro ကလည်း သတင်းမှာ ဖော်ပြတဲ့ အတိုင်းသာ မှန်ခဲ့မယ်ဆိုရင် သမ္မတ Trump ရာထူးက နုတ်ထွက် ဖို့နဲ့ ဒီလိုမှမဟုတ်ရင်တော့ အရေးယူခံရမှာ ဖြစ်ကြောင်း Twitter လူမှုကွန်ရက်ကနေ ပြောဆိုခဲ့ပါတယ်။

Colombia နိုင်ငံ ရဲသန်တန်းကျောင်း တိုက်ခိုက်ခံရ

ကိုလံဘီယာနိုင်ငံမှာ ကြာသပတေးနေ့က ရဲသင်တန်းကျောင်းတခုမှာ ပစ်ကပ်ထရပ်ကားနဲ့ အသေခံကားဗုံးဖေါက်ခွဲမှုတခု ဖြစ်ပွါးခဲ့တဲ့အတွက် အနဲဆုံး ၁၀ ဦးသေဆုံးပြီး ၅၄ ဦးထက်မနည်း ဒဏ်ရာရခဲ့ပါတယ်။

ကိုလံဘီယာနိုင်ငံ အနောက်ပိုင်းမှာ ဆွေးနွေးပွဲတက်ရောက်ဖို့ သွားနေတဲ့ သမ္မတ Ivan Duque ကတော့ဆွေးနွေးပွဲကို ဖျက်သိမ်းလိုက်ပြီး ဘိုဂိုတာနားက ပေါက်ကွဲမှုဖြစ်ပွါးရာနေရာကို အမြန် သွားရောက်ခဲ့ပါတယ်။

အခုလို တိုက်ခိုက်မှုဟာ ငယ်ရွယ်ရဲ့ လုံခြုံရေးတပ်သားတွေ ဒါမှမဟုတ် ရဲတွေကို တိုက်ခိုက်တာတင် မကပဲ ကိုလံဘီယာ လူမှုအသိုင်းအဝိုင်း ကိုပါ တိုက်ခိုက်တာ ဖြစ်ကြောင်း သမ္မတ ကပြောကြားခဲ့ပြီး အခုလို ဆိုးဝါးတဲ့ အကြမ်းဖက်လုပ်ရပ် အတွက် အရေးယူမှာ ဖြစ်ကြောင်း ပြောပါတယ်။

လက်တင်အမေရိက ဒေသဆိုင်ရာ အမေရိကန်လက်ထောက်နိုင်ငံခြားရေးဝန်ကြီး Kimberley Breier ကလည်း အခု တိုက်ခိုက်မှုကို ရှုံ့ချလိုက်ပြီး သေဆုံးဒဏ်ရာရသူတွေရဲ့ မိသားစုဝင်တွေအတွက် အမေရိကန်ပြည်ထောင်စုက ဝမ်းနဲကြေကွဲရပါကြောင်း ပြောကြားခဲ့ပါတယ်။

လက်နက်အပြည့်အစုံပါတဲ့ရဲတွေ၊ အနံ့ခံခွေးတွေနဲ့ လုံခြုံရေးစောင့်ကြည့် ကင်မရာတွေ တပ်ဆင်ထားတဲ့ ရဲသင်တန်းကျောင်း တောင်ဘက် ဂိတ်ကနေ ဗုံးပါတဲ့ ပစ်ကပ် ထရပ်ကားက ဖြတ်သွားခဲ့တာ ဖြစ်ပါတယ်။

ကားသမား ဘယ်သူဘယ်ဝါဆိုတာကို ကိုလံဘီယာအစိုးရှေ့နေတွေ ခုထိ မဖေါ်ထုတ်နိုင်သေးသလို ဘယ်အဖွဲ့အစည်းက တိုက်ခိုက်တယ် ဆိုတာကိုလည်း ခုထိ မကြေညာသေးပါဘူး။ ဒါပေမယ့် အဲဒီဒေသမှာ ELN သူပုန်အဖွဲ့ရဲ့ တိုက်ခိုက်မှုတွေ တိုးလာနေတာပါ။

ဗီယက်နမ် ပြည်ပပို့ကုန် အလားအလာကောင်း

နိုင်ငံခြားပို့ကုန်အပေါ် အားထားနေတဲ့ ဗီယက်နမ်နိုင်ငံဟာ ပစိဖိတ်ရပ်ဝန်း စီးပွားရေးပူးပေါင်းဆောင်ရွက်မှု သဘောတူစာချုပ် TPP ထဲကို ဝင်ရောက်ခွင့် ရလာတဲ့အတွက် ကမ္ဘာ့ဈေးကွက်ရဲ့ ထက်ဝက်ခန့်ရှိတဲ့ ဈေးကွက်ထဲကို အကောက်ခွန်မဲ့ တင်သွင်းခွင့် ရရှိတော့မှာဖြစ်ပါတယ်။ ဗွီအိုအေ သတင်းထောက် Ralph Jennings တိုင်ပေကနေ ပေးပို့တဲ့သတင်းကို ကိုဥာဏ်ဝင်းအောင်က တင်ပြမှာပါ။

ဗီယက်နမ်နိုင်ငံဟာ EU ဥရောပသမဂ္ဂနဲ့ သဘောတူညီမှု ချုပ်ဆိုနိုင်ခဲ့ပြီးနောက်၊ အဖွဲ့ဝင် ၁၁ နိုင်ငံပါရှိတဲ့ TPP နဲ့အခုဆက်လက်ပြီး သဘောတူညီမှု ရယူ လိုက်နိုင်တဲ့အတွက် ကမ္ဘာ့အသားတင် ကုန်ထုတ်လုပ်မှု စုစုပေါင်း ၄၅%ရှိတဲ့ ဈေးကွက်ကြီးထဲကို အကောက်ခွန်မဲ့ ဝင်ရောက်ခွင့် ရရှိတော့မှာဖြစ်ပါတယ်၊ WTO ခေါ် ကမ္ဘာ့ကုန်သွယ်ရေးအဖွဲ့ထဲကို အရင်က ဝင်ရောက်ခဲ့ပြီးနောက် နောက်ထပ်ကြီးမားတဲ့ စီးပွားရေးအခွင့်အလမ်းတခုကို ဗီယက်နမ်က ရသွားတာ ဖြစ်ပါတယ်။

TPP နဲ့ သဘောတူညီမှုကို ဇန်နဝါရီ ၁၄ ရက်မှာ စတင်အသက်ဝင်စေဖို့ ဗီယက်နမ် အမျိုးသားလွှတ်တော်က အတည်ပြုလိုက်ပါတယ်။ ဒါကြောင့် ကနေဒါနဲ့ ဂျပန်တို့လို ဈေးကွက်ကြီးတွေဆီ သွင်းကုန်ခွန်ကင်းလွတ်ခွင့် ရရှိတော့မှာပါ။ တချိန်ထဲမှာပဲ ဥရောပသမဂ္ဂနဲ့ ချုပ်ဆိုထားတဲ့ ကုန်သွယ်ရေး သဘောတူညီ ချက်ကို ဗီယက်နမ်အမျိုးသားလွှတ်တော်က အတည်ပြုမယ့်အရေးကိုလည်း စောင့်စားနေပါတယ်။ ဒီသဘောတူညီမှု ၂ခု ပေါင်းလိုက်ရင် ဗီယက်နမ်ဟာ ပို့ကုန်စွမ်းရည်၊ စီးပွားရေးလျှင်မြန်စွာ ကြီးထွားမှုနဲ့ လူလတ်တန်းစားဦးရေ တဟုန်ထိုး မြင့်တက်လာစေလိမ့်မယ်လို့ အကဲခတ်သမားတွေက ဆိုပါတယ်။

ထို့အတူ ပြည်ပ ရင်းနှီးမြှုပ်နှံသူတွေကိုလည်း ပိုမိုဆွဲဆောင်နိုင်လိမ့်မယ်လို့ တွက်ဆနေကြတာပါ။ တချိန်က တရုတ်ပြည်ကိုသာ ဦးတည်နေတဲ့ စက်ရုံ အလုပ်ရုံ ရင်းနှီးမြှုပ်နှံသူတွေဟာ အကယ်၍ ဗီယက်နမ်ကသာ အသိဥာဏ်ဆိုင်ရာ ပစ္စည်းမူပိုင်ခွင့်နဲ့ အလုပ်သမား အခွင့်အရေးဆိုင်ရာ ကိစ္စတွေမှာ ပြုပြင် ပြောင်းလဲမှု လုပ်လိုက်မယ်ဆိုရင် ဗီယက်နမ်ဘက်ကို လှည့်လာကြမှာ ဖြစ်ပါတယ်။ Frederick Burke ဟာ ဟိုချီမင်းမြို့တော်က Baker McKenzie ဥပဒေအကျိုးဆောင်အဖွဲ့နဲ့ ပူးတွဲဆောင်ရွက်နေသူ ဖြစ်ပါတယ်။

“ဗီယက်နမ်ဟာ သူတပါးနဲ့ယှဉ်ရင် အတော့်ကိုသက်သာတဲ့ အကောက်ခွန်နှုန်းထားနဲ့ ပို့ကုန်ဈေးကွက်ထဲကို ဝင်ရောက်လာမှာ ဖြစ်ပါတယ်။ TPP နဲ့ ရရှိလာမယ့်အခွင့်အရေးဟာ WTO နဲ့ရရှိထားတဲ့ အခွင့်အရေးထက် ပိုများလာမလား ဆိုတာကတော့ ပြောဖို့ခက်ပါတယ်။ ၂၀၁၈ ခုတုန်းက WTO ကြောင့် ဗီယက်နမ်ကို ပြည်ပ ရင်းနှီးမြှုပ်နှံမှုတွေ အဆမတန် ဝင်ရောက်လာတာကိုတော့ ကျနော်တို့ တွေ့ခဲ့ရပါတယ်။”

TPP ကုန်သွယ်ရေး သဘောတူစာချုပ်ထဲ ဝင်လာတဲ့ ဗီယက်နမ်ဟာ အကျိုးအမြတ်အများဆုံးရလာမယ့် အခြေအနေမှာရှိမယ်လို့ ခန့်မှန်းနေကြပါတယ်။ အကြောင်းကတော့ ဗီယက်နမ်မှာ ပြည်တွင်းစီးပွားရေး တိုးတက်နေတာရယ် ၊ ၂၀၁၇ တနှစ်ထဲမှာတင် ပြည်ပပို့ကုန်ပမာဏ ဒေါ်လာဘီလျံ (၂၀၀)ဖိုးရှိခဲ့ တာရယ်ကြောင့် ဖြစ်တယ်လို့ဆိုပါတယ်။ TPP ထဲပါတဲ့ အခြားနိုင်ငံတွေကတော့ ဗီယက်နမ်ထုတ် ပစ္စည်းတွေကို တင်သွင်းရဖို့ များနေပါတယ်။

တချိန်က စစ်ဒဏ်ကို အကြီးကျယ်ခံခဲ့ရတဲ့ ဗီယက်နမ်ဟာ ၁၉၈၆ ခုနှစ်နောက်ပိုင်း နိုင်ငံခြားရင်းနှီးမြှုပ်နှံမှုတွေ တိုင်းပြည်ထဲဝင်လာပြီး စက်ရုံတွေ တည်ထောင်လာနိုင်တာကြောင့် အဝတ်အထည်ကစ လျှပ်စစ်ပစ္စည်းအထိ နိုင်ငံခြားကို တင်ပို့လာနိုင်ခဲ့ပါတယ်။ ၂၀၀၈ ခုနှစ်မှာ WTO အဖွဲ့ထဲကို ဝင်ခွင့် ရခဲ့ပြီး အခြားသောအဖွဲ့ဝင် ၁၆၄ နိုင်ငံနည်းတူ ကုန်သွယ်ရေးဆိုင်ရာ အခွင့်ရေးတွေရခဲ့ပါတယ်။ ဈေးနှုန်းချိုသာတဲ့ ဗီယက်နမ်ထုတ် ရှုးဖိနပ်တွေကို TPP အဖွဲ့ဝင် သြစတြေးလျနိုင်ငံဆီ အဓိက တင်ပို့နိုင်ခဲ့တယ်လို့ ဗီယက်နမ် ဟနွိုင်းမြို့က မဲခေါင်ဒေသစီးပွားရေးလေ့လာနေတဲ့ စီးပွားရေးပညာရှင် Adam McCarty ကပြောပါတယ်။

ဥရောပနဲ့ ပစိဖိတ်ဒေသနိုင်ငံတွေကလည်း ဗီယက်နမ်နဲ့ ကုန်သွယ်ရေးသဘောတူညီမှု ရချင်ကြပြီး၊ ဒီလိုဖြစ်လာခဲ့ရင် သူတို့ရဲ့ကုန်ပစ္စည်းတွေကို ဗီယက်နမ်လူလတ်တန်းစားကို ပစ်မှတ်ထားပြီး ရောင်းချနိုင်မယ်လို့ မျှော်လင့်နေကြပါတယ်။ လူဦးရေ ၉၃သန်းရှိတဲ့ ဗီယက်နမ်မှာ လူလတ်တန်းစာက သုံးပုံတပုံရှိ ပါတယ်။

လွန်ခဲ့တဲ့ ဆယ်စုနှစ်အတွင်း EU-ဗီယက်နမ် ကုန်သွယ်ရေးပမာဏ ၅ ဆလောက် တိုးလာတာကြောင့် ဗီယက်နမ်ပြည်တွင်း အသားတင်ကုန်ထုတ်လုပ်မှု ၁၅% တိုးလာခဲ့တယ်လို့ EU ပါလီမန်ကြေညာချက်မှာ ပြောထားပါတယ်။ EU-ဗီယက်နမ်ကြား ကုန်သွယ်ရေး သဘောတူညီမှုကို ဘယ်ပုံဘယ်နည်း အတည်ပြုရမလဲဆိုတာနဲ့ ပတ်သက်ပြီး မရှင်းလင်းသေးပေမယ့်ဒီနှစ်အတွင်းမှာတော့ အပြီးသတ်အတည်ပြုနိုင်ဖို့ မျှော်လင့်နေပါတယ်။ အခုဆိုရင် TPP ထဲကို ဗီယက်နမ် ဝင်ရောက်ခွင့်ရလိုက်တာကြောင့် အခြားအဖွဲ့ဝင် ၁၀ နိုင်ငံကလည်း စီးပွားရေးဆိုင်ရာ လုပ်ငန်းတွေ အစပျိုးနိုင်ပြီဖြစ်ပါတယ်။

TPP အဖွဲ့ဝင် ဖြစ်လာရင် ဗီယက်နမ်ဟာ လွတ်လပ်တဲ့ အလုပ်သမား သမဂ္ဂတွေကို ခွင့်ပြုရမယ် စသဖြင့် လုပ်ဆောင်စရာတွေအများကြီး ရှီနေဆဲဖြစ်တယ် လို့ ကျွမ်းကျင်သူတွေက ဆိုပါတယ်။ Carl Thayer ဟာ သြစတြေးလျနိုင်ငံ New South Wales တက္ကသိုလ်က ပါမောက္ခတဥိးဖြစ်ပါတယ်။

“ဗီယက်နမ်ဟာ အခုအခါ TPP စာချုပ်ကို လက်မှတ်ရေးထိုးတဲ့ သဘောတူညီချက်ကို လွှတ်တော်က အတည်ပြုလိုက်ပြီဖြစ်တဲ့အတွက် ပြုပြင်ပြောင်းလဲရေး လိုချင်သူတွေအတွက် မဖြစ်မနေ လုပ်ဖြစ်အောင် တွန်းပို့တဲ့သဘော ဖြစ်လာပါတယ်။ နိုင်ငံတကာ စံချိန်စံညွှန်းတွေနဲ့ ကိုက်ညီအောင် လုပ်ဖို့တော့ လိုပါသေးတယ် ။”

ဖွံ့ဖြိုးဆဲ အာရှနိုင်ငံတွေကြားမှာ ဗီယက်နမ်နိုင်ငံဟာ တရုတ်ထက် လုပ်အားခ ဈေးသက်သာတဲ့အတွက် ရင်းနှီးမြှုပ်နှံသူတွေကြား ပိုပြီး ထင်ရှားလာနေ ပါတယ်။ တရုတ်နိုင်ငံဟာလည်း လွတ်လပ်တဲ့ အလုပ်သမားသမဂ္ဂဖွဲ့စည်းခွင့် အသိဥာဏ်ဆိုင်ရာ ပစ္စည်းမူပိုင်ခွင့် ကာကွယ်ရေးတို့မှာ လစ်ဟာနေ ပါသေးတယ် ။ ၂၀၁၈ အတွင်း ဖြစ်ပွါးခဲ့တဲ့ တရုတ်-အမေရိကန် ကုန်သွယ်ရေးအငြင်းပွားမှုဟာလည်း တရုတ်အတွက် အခက်အခဲ ဖြစ်နေပါတယ်။ ဒီကိစ္စနဲ့ပတ်သက်ပြီး McCarty ကခုလိုပြောပါတယ်။

“ TPP ကသတ်မှတ်ထားတဲ့ လိုအပ်ချက်တွေဟာ တရုတ်အတွက်တော့ သိပ်ဆွဲဆောင်မှု မရှိပါဘူး။ အသိဥာဏ်ဆိုင်ရာ ပစ္စည်းမူပိုင်ခွင့်နဲ့ အမေရိကန်သမ္မတ ဒေါ်နယ်ထရမ့်က တောင်းဆိုထားတဲ့ ကိစ္စတွေ စသဖြင့် ပြသနာတွေအများကြီး ရှိနေပါတယ်။ အလုပ်သမား အခွင့်အရေးနဲ့ ပတ်သက်လို့လည်း TPP က သတ်မှတ်တဲ့အတိုင်း လိုက်လျောဖို့ ခက်ပါလိမ့်မယ် ၊ ဒါကြောင့် တရုတ်နိုင်ငံက TPP မှာ လက်မှတ်ထိုးဖို့ မဖြစ်နိုင်သေးပါဘူး။”

ဗီယက်နမ်ရဲ့ စီးပွားရေးကို လက်ရှိထက်ပိုပြီး တိုးတက်အောင်လုပ်ဖို့ဆိုရင် TPP ရဲ့သတ်မှတ်ချက်စံနှုန်းတွေအတိုင်း လိုက်လျောဖို့လိုတယ်ဆိုတာ အာဏာပိုင်တွေက သဘောပေါက်နေကြောင်း ဗီယက်နမ်ပညာရှင်တချို့က သုံးသပ်နေကြပါတယ်။

Credit – VOA Burmese

ကန်အစိုးရယန္တရား ပြန်ဖွင့်ရေး အလှမ်းဝေးသေး

အမေရိကန်နဲ့ မက်ဆီကိုကြား နယ်စပ်တံတိုင်း တည်ဆောက်ရေးနဲ့ ပတ်သက်ပြီး အငြင်းပွါးမှုတွေ ဆက်ပြီး ဖြစ်နေတဲ့အတွက် အစိုးရယန္တရား တစိတ်တပိုင်း ရပ်နားထားရတာ သီတင်း ၅ ပတ်ထဲ ဝင်လာတော့မှာ ဖြစ်ပေမယ့် ကြာသပတေးနေ့အထိ အမေရိကန်သမ္မတ Donald Trump နဲ့ အောက်လွှတ်တော်ဥက္ကဌ Nancy Pelosi တို့ကြား အပြန်အလှန် အပြစ်တွေ တင်နေကြဆဲ ဖြစ်ပါတယ်။

အောက်လွှတ်တော်နဲ့ အထက်လွှတ်တော်က ဒီမိုကရက်အမတ်အများအပြားက သဘောတူညီမှု ရအောင် လုပ်ချင်နေပေမယ့် လွှတ်တော်ဥက္ကဌ Pelosi ကတော့ သူတို့ကို ညှိနှိုင်းခွင့် မပေးဘူးလို့ သမ္မတ Trump က ကာကွယ်ရေးဌာနမှာ ပြောကြားတဲ့ မိန့်ခွန်းမှာ ပြောဆိုခဲ့ပါတယ်။ ဒီမိုကရက်အမတ်တွေ အနေနဲ့ တိုင်းပြည်အတွက် မှန်ကန်တဲ့အရာကို လုပ်ဆောင်ဖို့ ရှေ့ကိုလှမ်းလာမယ်လို့ သူမျှော်လင့်ကြောင်းနဲ့ နိုင်ငံအတွက် မှန်ကန်တဲ့အရာက နယ်စပ်လုံခြုံရေးကို အခိုင်မာဆုံး အဆင့်ဖြစ်အောင် လုပ်ဖို့ဖြစ်ကြောင်းလည်း ပြောပါတယ်။

ဒီမိုကရက်တွေကလည်း အစိုးရယန္တရားပြန်ဖွင့်တာနဲ့ နယ်စပ်လုံခြုံရေးကို ပိုထိရောက်အောင် လုပ်ဖို့ သူတို့ဘက်က ညှိနှိုင်းမှုတွေ ခိုင်ခိုင်မာမာ လုပ်ဆောင်မှာ ဖြစ်ကြောင်း ဒါပေမယ့် နယ်စပ်တံတိုင်းကာရံမှုဟာ ထိရောက်မှုမရှိပဲ အလဟဿဖြုန်းတာမျိုးဖြစ်သလို အမေရိကန်တွေရဲ့ ပုံရိပ်လည်း ထိခိုက်စေတယ်လို့ ပြောပါတယ်။

ထိပ်တန်း ဒီမိုကရက်ပါတီဝင် လွှတ်တော်ဥက္ကဌ Nancy Pelosi ကတော့ သမ္မတ Trump ရဲ့ နယ်စပ်တံတိုင်းဟာ ဇိမ်ခံပစ္စည်းလို အပိုဖြစ်နေပြီး ဒီ့အတွက် ငွေကုန်ကြေးကျ မခံနိုင် ဘူးလို့ ပြောပါတယ်။ ဇန်နဝါရီလ ၂၉ ရက်နေ့မှာ သမ္မတ Trump ပြောကြားဖို့ရှိတဲ့ နိုင်ငံတော် အခြေပြမိန့်ခွန်းကိုလည်း ရက်ရွှေ့ဆိုင်းဖို့ Nancy Pelosi က ပြောနေတာပါ။

ထိပ်သီးဆွေးနွေးပွဲပြန်စဖို့ မြောက်ကိုရီးယားအရာရှိ ၀ါရှင်တန် လာရောက်

အမေရိကန်သမ္မတ Donald Trump နဲ့ မြောက်ကိုရီးယားခေါင်းဆောင် Kim Jong Un တို့ ဒုတိယအကြိမ် ထိပ်သီးဆွေးနွေးပွဲအတွက် စီစဉ်ဖို့ ၀ါရှင်တန်ကိုသွားမယ့် မြောက်ကိုရီးယား ထိပ်တန်းအရာရှိတယောက်ဟာ တရုတ်နိုင်ငံ ဘေဂျင်းမြို့တော်ကို ဒီကနေ့ ရောက်လာခဲ့ကြောင်း တောင်ကိုရီးယားနိုင်ငံက Yonhap သတင်းက ဖော်ပြပါတယ်။

မြောက်ကိုရီးယား အဆင့်မြင့်အရာရှိ Kim Yong Chol ဟာ တရုတ်နိုင်ငံက Air China လေကြောင်းလိုင်းနဲ့ ဒီနေ့နှောင်းပိုင်း ၀ါရှင်တန်ကို ရောက်လာမှာပါ။ မနက်ဖြန် သောကြာနေ့မှာတော့ မြောက်ကိုရီးယားအရာရှိဟာ အမေရိကန် နိုင်ငံခြားရေးဝန်ကြီး Mike Pompeo နဲ့ တွေ့ဆုံဆွေးနွေးပြီး၊ နောက်ပိုင်း အိမ်ဖြူတော်မှာ သမ္မတ Trump ကို နှုတ်ဆက်ဖို့လည်း စီစဉ်ထားပါတယ်။ အမေရိကန်သမ္မတနဲ့ တွေ့ဆုံချိန်မှာ မြောက်ကိုရီးယားခေါင်းဆောင်ထံက စာတစောင်ကို ပေးအပ်ဖို့ ရှိတယ်လို့လည်း Yonhap သတင်းက ဖော်ပြခဲ့တာပါ။

အမေရိကန်သမ္မတတဦးအဖြစ် တာဝန်ယူထားချိန်မှာ ပထမဆုံးအကြိမ် မြောက်ကိုရီးယား ခေါင်းဆောင်နဲ့ တွေ့ဆုံမှုအဖြစ် ပြီးခဲ့တဲ့နှစ် ဇူလိုင်လထဲ စင်္ကာပူနိုင်ငံမှာ ခေါင်းဆောင် ၂ ဦး တွေ့ဆုံခဲ့ကြတာ ဖြစ်ပါတယ်။ သမိုင်းဝင်ထိပ်သီးဆွေးနွေးပွဲ နောက်ဆက်တွဲအဖြစ် ၂ နိုင်ငံ ခေါင်းဆောင်တွေ မကြာခင် နောက်တကြိမ်တွေ့ဆုံဖြစ်မယ့် အလားအလာတွေလည်း ကြီးထွားလာနေချိန် ပြီးခဲ့တဲ့ သီတင်းပတ်ထဲမှာပဲ မြောက်ကိုရီးယား ခေါင်းဆောင်ဟာလည်း တရုတ်နိုင်ငံ ဘေဂျင်းမြို့တော်ကို သွားရောက်ခဲ့တာပါ။

တရုတ်နိုင်ငံ ခရီးစဉ်အတွင်း သမ္မတ Xi Jinping နဲ့ တွေ့ဆုံခဲ့တဲ့အတွက်လည်း အမေရိကန်သမ္မတနဲ့ မတွေ့ခင်မှာ တရုတ်ခေါင်းဆောင်တွေနဲ့ အရင်တိုင်ပင်ပုံရတယ်လို့ ခန့်မှန်းချက်တွေလည်း ထွက်ပေါ်ခဲ့ပါတယ်။ ပထမတကြိမ် စင်္ကာပူနိုင်ငံက ထိပ်သီးတွေ့ဆုံပွဲမှာတော့ မြောက်ကိုရီးယားရဲ့ နျူကလီးယား အစီအစဉ်တွေ အဆုံးသတ်ရေး ၂ ဘက်အကြား ယေဘုယျဆန်ဆန် သဘောတူညီချက် ရခဲ့ကြတာပါ။ ဒါပေမဲ့လည်း တိုးတက်မှုတချို့အတွက် အမေရိကန်ရဲ့ ဒဏ်ခတ်မှုတွေကို လျှော့ပေါ့ပေးဖို့ မြောက်ကိုရီးယားက တောင်းဆိုနေသလို၊ အမေရိကန်ကလည်း နျူကလီးယားလုပ်ငန်းတွေ အရင်ဆုံးရပ်ဖို့ တောင်းဆိုနေတဲ့အတွက် နောက်ဆက်တွဲ ဆွေးနွေးမှုတွေ ရှေ့မတိုးနိုင်ပဲ ဖြစ်နေပါတယ်။

ဆီးရီယား Manbij မြို့တိုက်ခိုက်မှု အမေရိကန် ၄ ဦး သေဆုံး

ဆီးရီးယားနိုင်ငံမြောက်ပိုင်း Manbij မြို့က စားသောက်ဆိုင် တဆိုင်ရှေ့မှာ အသေခံဗုံးခွဲသမားတဦးရဲ့ တိုက်ခိုက်မှုကြောင့် အမေရိကန် နိုင်ငံသား ၄ ဦး သေဆုံးခဲ့ပါတယ်။ တိုက်ခိုက်မှုကြောင့် အမေရိကန် တပ်ဖွဲ့တွေ ဆီးရီးယားကနေ ပြန်လည်ရုပ်သိမ်းတဲ့အခါ ကြုံရမယ့် အလားအလာတွေ အပေါ်မှာလည်း မေးခွန်းတွေ ထွက်ပေါ်လာနေပါတယ်။

IS အစ္စလာမ်စစ်သွေးကြွအဖွဲ့ကတော့ မနေ့တုန်းက တိုက်ခိုက်မှုဟာ သူတို့လက်ချက်ဖြစ်ကြောင်း ချက်ခြင်းဆိုသလို ကြေညာခဲ့သလို၊ တိုက်ခိုက်သူဟာ ဆီးရီးယားနိုင်ငံသား အဖွဲ့ဝင်တဦးဖြစ်ပြီး ကင်းလှည့်နေတဲ့ အမေရိကန်နဲ့ ညွန့်ပေါင်းတပ်ဖွဲ့တွေကို ပစ်မှတ်ထားခဲ့တာ ဖြစ်ကြောင်းလည်း ပြောဆိုခဲ့တာပါ။ တိုက်ခိုက်မှုအတွင်း အမေရိကန် တပ်ဖွဲ့ဝင် ၂ ဦး ပွဲချင်းပြီး သေဆုံးခဲ့ကြောင်းလည်း Manbij မြို့က ဆရာဝန်တွေက ဗွီအိုအေကို ပြောပါတယ်။

ဒဏ်ရာရသူတွေကို အိမ်နီးချင်း အီရတ်နိုင်ငံက ဆေးခန်းတွေကို ပို့ဆောင်ခဲ့ကြောင်းလည်း အမေရိကန်က ထောက်ခံမှုပေးထားတဲ့ ဆီးရီးယား ဒီမိုကရက်တစ် အင်အားစုအဖွဲ့က တာဝန်ရှိသူတွေက ပြောပါတယ်။ ပေါက်ကွဲမှုအတွင်း အရပ်သားဝန်ထမ်းတဦးနဲ့ ကာကွယ်ရေးဌာန ကန်ထရိုက်ဝန်ထမ်း တဦးတို့ သေဆုံးခဲ့ကြောင်းလည်း အမေရိကန်စစ်တပ်က မနေ့နှောင်းပိုင်းမှာ ထုတ်ပြန်တဲ့ ကြေညာချက်က ဖော်ပြခဲ့တာပါ။ တိုက်ခိုက်မှုကြောင့် အမေရိကန် တပ်ဖွဲ့ဝင် ၃ ယောက်လည်း ဒဏ်ရာရခဲ့ပါတယ်။ အမေရိကန် တပ်ဖွဲ့တွေ ပုံမှန်ကင်းလှည့်နေချိန် တိုက်ခိုက်မှု ဖြစ်ခဲ့ကြောင်းလည်း အမေရိကန်ဦးဆောင်တဲ့ ညွန့်ပေါင်းတပ်ဖွဲ့တွေရဲ့ ပြောခွင့်ရက ပြောဆိုခဲ့တာပါ။

တိုက်ခိုက်မှုဖြစ်ရာ နေရာက ဗွီဒီယိုတွေ ဓာတ်ပုံတွေမှာတော့ အလောင်းတွေ ပြန့်ကျဲနေတာတွေ၊ သွေးတွေ ပေကျံနေတဲ့ နံရံတွေကို တွေ့ရပါတယ်။ တိုက်ခိုက်ခံရတဲ့နေရာဟာ အမေရိကန်နဲ့ ညွန့်ပေါင်း မဟာမိတ်တွေ ဆုံလေ့ရှိတဲ့နေရာ ဖြစ်ကြောင်းလည်း အခင်းဖြစ်ရာနေရာက ကိုယ်တိုင်တွေ့သူတွေက ပြောပါတယ်။ တိုက်ခိုက်မှုကြောင့် အရပ်သား ၁၀ ဦးထက်မနည်း သေဆုံးခဲ့ကြောင်းလည်း ဗြိတိန်အခြေစိုက် ဆီးရီးယား လူ့အခွင့်အရေး စောင့်ကြည့်အကဲခတ် အဖွဲ့က ပြောပါတယ်။