ထိပ်သီးဆွေးနွေးပွဲပြန်စဖို့ မြောက်ကိုရီးယားအရာရှိ ၀ါရှင်တန် လာရောက်

အမေရိကန်သမ္မတ Donald Trump နဲ့ မြောက်ကိုရီးယားခေါင်းဆောင် Kim Jong Un တို့ ဒုတိယအကြိမ် ထိပ်သီးဆွေးနွေးပွဲအတွက် စီစဉ်ဖို့ ၀ါရှင်တန်ကိုသွားမယ့် မြောက်ကိုရီးယား ထိပ်တန်းအရာရှိတယောက်ဟာ တရုတ်နိုင်ငံ ဘေဂျင်းမြို့တော်ကို ဒီကနေ့ ရောက်လာခဲ့ကြောင်း တောင်ကိုရီးယားနိုင်ငံက Yonhap သတင်းက ဖော်ပြပါတယ်။

မြောက်ကိုရီးယား အဆင့်မြင့်အရာရှိ Kim Yong Chol ဟာ တရုတ်နိုင်ငံက Air China လေကြောင်းလိုင်းနဲ့ ဒီနေ့နှောင်းပိုင်း ၀ါရှင်တန်ကို ရောက်လာမှာပါ။ မနက်ဖြန် သောကြာနေ့မှာတော့ မြောက်ကိုရီးယားအရာရှိဟာ အမေရိကန် နိုင်ငံခြားရေးဝန်ကြီး Mike Pompeo နဲ့ တွေ့ဆုံဆွေးနွေးပြီး၊ နောက်ပိုင်း အိမ်ဖြူတော်မှာ သမ္မတ Trump ကို နှုတ်ဆက်ဖို့လည်း စီစဉ်ထားပါတယ်။ အမေရိကန်သမ္မတနဲ့ တွေ့ဆုံချိန်မှာ မြောက်ကိုရီးယားခေါင်းဆောင်ထံက စာတစောင်ကို ပေးအပ်ဖို့ ရှိတယ်လို့လည်း Yonhap သတင်းက ဖော်ပြခဲ့တာပါ။

အမေရိကန်သမ္မတတဦးအဖြစ် တာဝန်ယူထားချိန်မှာ ပထမဆုံးအကြိမ် မြောက်ကိုရီးယား ခေါင်းဆောင်နဲ့ တွေ့ဆုံမှုအဖြစ် ပြီးခဲ့တဲ့နှစ် ဇူလိုင်လထဲ စင်္ကာပူနိုင်ငံမှာ ခေါင်းဆောင် ၂ ဦး တွေ့ဆုံခဲ့ကြတာ ဖြစ်ပါတယ်။ သမိုင်းဝင်ထိပ်သီးဆွေးနွေးပွဲ နောက်ဆက်တွဲအဖြစ် ၂ နိုင်ငံ ခေါင်းဆောင်တွေ မကြာခင် နောက်တကြိမ်တွေ့ဆုံဖြစ်မယ့် အလားအလာတွေလည်း ကြီးထွားလာနေချိန် ပြီးခဲ့တဲ့ သီတင်းပတ်ထဲမှာပဲ မြောက်ကိုရီးယား ခေါင်းဆောင်ဟာလည်း တရုတ်နိုင်ငံ ဘေဂျင်းမြို့တော်ကို သွားရောက်ခဲ့တာပါ။

တရုတ်နိုင်ငံ ခရီးစဉ်အတွင်း သမ္မတ Xi Jinping နဲ့ တွေ့ဆုံခဲ့တဲ့အတွက်လည်း အမေရိကန်သမ္မတနဲ့ မတွေ့ခင်မှာ တရုတ်ခေါင်းဆောင်တွေနဲ့ အရင်တိုင်ပင်ပုံရတယ်လို့ ခန့်မှန်းချက်တွေလည်း ထွက်ပေါ်ခဲ့ပါတယ်။ ပထမတကြိမ် စင်္ကာပူနိုင်ငံက ထိပ်သီးတွေ့ဆုံပွဲမှာတော့ မြောက်ကိုရီးယားရဲ့ နျူကလီးယား အစီအစဉ်တွေ အဆုံးသတ်ရေး ၂ ဘက်အကြား ယေဘုယျဆန်ဆန် သဘောတူညီချက် ရခဲ့ကြတာပါ။ ဒါပေမဲ့လည်း တိုးတက်မှုတချို့အတွက် အမေရိကန်ရဲ့ ဒဏ်ခတ်မှုတွေကို လျှော့ပေါ့ပေးဖို့ မြောက်ကိုရီးယားက တောင်းဆိုနေသလို၊ အမေရိကန်ကလည်း နျူကလီးယားလုပ်ငန်းတွေ အရင်ဆုံးရပ်ဖို့ တောင်းဆိုနေတဲ့အတွက် နောက်ဆက်တွဲ ဆွေးနွေးမှုတွေ ရှေ့မတိုးနိုင်ပဲ ဖြစ်နေပါတယ်။

ဆီးရီယား Manbij မြို့တိုက်ခိုက်မှု အမေရိကန် ၄ ဦး သေဆုံး

ဆီးရီးယားနိုင်ငံမြောက်ပိုင်း Manbij မြို့က စားသောက်ဆိုင် တဆိုင်ရှေ့မှာ အသေခံဗုံးခွဲသမားတဦးရဲ့ တိုက်ခိုက်မှုကြောင့် အမေရိကန် နိုင်ငံသား ၄ ဦး သေဆုံးခဲ့ပါတယ်။ တိုက်ခိုက်မှုကြောင့် အမေရိကန် တပ်ဖွဲ့တွေ ဆီးရီးယားကနေ ပြန်လည်ရုပ်သိမ်းတဲ့အခါ ကြုံရမယ့် အလားအလာတွေ အပေါ်မှာလည်း မေးခွန်းတွေ ထွက်ပေါ်လာနေပါတယ်။

IS အစ္စလာမ်စစ်သွေးကြွအဖွဲ့ကတော့ မနေ့တုန်းက တိုက်ခိုက်မှုဟာ သူတို့လက်ချက်ဖြစ်ကြောင်း ချက်ခြင်းဆိုသလို ကြေညာခဲ့သလို၊ တိုက်ခိုက်သူဟာ ဆီးရီးယားနိုင်ငံသား အဖွဲ့ဝင်တဦးဖြစ်ပြီး ကင်းလှည့်နေတဲ့ အမေရိကန်နဲ့ ညွန့်ပေါင်းတပ်ဖွဲ့တွေကို ပစ်မှတ်ထားခဲ့တာ ဖြစ်ကြောင်းလည်း ပြောဆိုခဲ့တာပါ။ တိုက်ခိုက်မှုအတွင်း အမေရိကန် တပ်ဖွဲ့ဝင် ၂ ဦး ပွဲချင်းပြီး သေဆုံးခဲ့ကြောင်းလည်း Manbij မြို့က ဆရာဝန်တွေက ဗွီအိုအေကို ပြောပါတယ်။

ဒဏ်ရာရသူတွေကို အိမ်နီးချင်း အီရတ်နိုင်ငံက ဆေးခန်းတွေကို ပို့ဆောင်ခဲ့ကြောင်းလည်း အမေရိကန်က ထောက်ခံမှုပေးထားတဲ့ ဆီးရီးယား ဒီမိုကရက်တစ် အင်အားစုအဖွဲ့က တာဝန်ရှိသူတွေက ပြောပါတယ်။ ပေါက်ကွဲမှုအတွင်း အရပ်သားဝန်ထမ်းတဦးနဲ့ ကာကွယ်ရေးဌာန ကန်ထရိုက်ဝန်ထမ်း တဦးတို့ သေဆုံးခဲ့ကြောင်းလည်း အမေရိကန်စစ်တပ်က မနေ့နှောင်းပိုင်းမှာ ထုတ်ပြန်တဲ့ ကြေညာချက်က ဖော်ပြခဲ့တာပါ။ တိုက်ခိုက်မှုကြောင့် အမေရိကန် တပ်ဖွဲ့ဝင် ၃ ယောက်လည်း ဒဏ်ရာရခဲ့ပါတယ်။ အမေရိကန် တပ်ဖွဲ့တွေ ပုံမှန်ကင်းလှည့်နေချိန် တိုက်ခိုက်မှု ဖြစ်ခဲ့ကြောင်းလည်း အမေရိကန်ဦးဆောင်တဲ့ ညွန့်ပေါင်းတပ်ဖွဲ့တွေရဲ့ ပြောခွင့်ရက ပြောဆိုခဲ့တာပါ။

တိုက်ခိုက်မှုဖြစ်ရာ နေရာက ဗွီဒီယိုတွေ ဓာတ်ပုံတွေမှာတော့ အလောင်းတွေ ပြန့်ကျဲနေတာတွေ၊ သွေးတွေ ပေကျံနေတဲ့ နံရံတွေကို တွေ့ရပါတယ်။ တိုက်ခိုက်ခံရတဲ့နေရာဟာ အမေရိကန်နဲ့ ညွန့်ပေါင်း မဟာမိတ်တွေ ဆုံလေ့ရှိတဲ့နေရာ ဖြစ်ကြောင်းလည်း အခင်းဖြစ်ရာနေရာက ကိုယ်တိုင်တွေ့သူတွေက ပြောပါတယ်။ တိုက်ခိုက်မှုကြောင့် အရပ်သား ၁၀ ဦးထက်မနည်း သေဆုံးခဲ့ကြောင်းလည်း ဗြိတိန်အခြေစိုက် ဆီးရီးယား လူ့အခွင့်အရေး စောင့်ကြည့်အကဲခတ် အဖွဲ့က ပြောပါတယ်။

အိမ်ဖြူတော် တိုက်ခိုက်မယ့် သံသယရှိသူတဦး FBI ဖမ်းဆီး

အမေရိကန်သမ္မတ အိမ်ဖြူတော်ကို တင့်ကားဖျက်ရော့ကတ်နဲ့ တိုက်ခိုက်ဖို့ စီစဉ်ခဲ့တဲ့ စွပ်စွဲချက်နဲ့ IS အစ္စလာမ် စစ်သွေးကြွတွေကို ထောက်ခံသူအဖြစ် သံသယရှိသူတဦးကို ပြည်ထောင်စု စုံစမ်းစစ်ဆေးရေးဗျုရို (FBI) က ဖမ်းဆီးလိုက်ပါတယ်။ ဂျော်ဂျီယာပြည်နယ်၊ Cumming မြို့က အသက် ၂၁ နှစ်အရွယ် Hasher Jallan Taheb ဆိုသူကို မနေ့တုန်းကပဲ ဖမ်းဆီးလိုက်တာပါ။

သူ့ကိုတော့ အမေရိကန်ပိုင် အဆောက်အဦးတခုကို လက်နက်၊ ဖောက်ခွဲရေးပစ္စည်းနဲ့ ဖျက်ဆီးရန် ကြံစည်မှုနဲ့ အရေးယူခံရနိုင်ပါတယ်။ လျို့ဝှက်ထောက်လှမ်းရေး အရာရှိတွေထံက သေနတ်နဲ့ ဖောက်ခွဲရေးပစ္စည်းတွေကို သူ့ကားနဲ့ လဲလှယ်ဖို့ ကြိုးပမ်းချိန်မှာ FBI က ဖမ်းဆီးခဲ့တာပါ။ ဖမ်းဆီးချိန်မှာ သူဟာ အကြမ်းဖက် အဖွဲ့အစည်းတခုခုနဲ့ ပတ်သက်မှုရှိတာ မတွေ့ရကြောင်းလည်း စုံစမ်းစစ်ဆေးသူတွေက ပြောပါတယ်။

ဖမ်းဆီးခံခဲ့ရသူဟာ အစွန်းရောက်ဝါဒ သွတ်သွင်းခံထားရပြီး၊ ခရီးထွက်ဖို့ စီစဉ်နေကြောင်း သူ့ကိုသိတဲ့သူတယောက်က ပြီးခဲ့တဲ့နှစ်ထဲမှာပဲ ဒေသခံရဲတပ်ဖွဲ့ကို သတင်းပေးခဲ့တယ်လို့လည်း တရားလိုဘက်က ပြောဆိုထားပါတယ်။ ရဲတပ်ဖွဲ့က FBI ကို အကြောင်းကြားခဲ့ရာက အမှုကို စုံစမ်းရာမှာ IS စစ်သွေးကြွတွေရှိရာ နယ်မြေကို သွားဖို့ သူ့ကားကိုရောင်းချင်တဲ့အကြောင်း လျို့ဝှက်ထောက်လှမ်းရေးတွေမှန်း မသိဘဲ ပြောခဲ့တယ်လို့လည်း ဆိုပါတယ်။

အိမ်ဖြူတော်၊ လွတ်လပ်ရေးရုပ်တု၊ လင်ကွန်းအမှတ်တရရုပ်တုနဲ့ နေရာအတိအကျ ဖော်ပြမထားတဲ့ ဂျုးဘုရားကျောင်းတွေကို သေနတ်၊ လက်ပစ်ဗုံး၊ ဖောက်ခွဲရေးပစ္စည်းတွေ၊ လက်နက်တွေနဲ့ တိုက်ခိုက်ချင်တဲ့အကြောင်း ပြောဆိုခဲ့တယ်လို့လည်း စွပ်စွဲထားတာပါ။ အိမ်ဖြူတော်ကို တိုက်ခိုက်မယ့် အစီအစဉ်နဲ့ ပတ်သက်လို့ ပြောဆိုရာမှာတော့၊ အိမ်ဖြူတော်နောက်ဖက်က လမ်းပေါ်မှာ အာရုံပြောင်းဖို့ ကြိုးပမ်းပြီး ရဲတွေက စုံစမ်းနေချိန်မှာ လူများနိုင်သလောက်များများ သေဆုံးအောင် ရော့ကတ်နဲ့ အိမ်ဖြူတော်ထဲ ပစ်ခတ်ဖို့ စီစဉ်ထားကြောင်းလည်း စွပ်စွဲထားပါတယ်။

AA စခန်းသိမ်းခံရမှု တပ်မတော်ထုတ်ပြန်ချက် AA ငြင်းဆန်

ရခိုင်ပြည်နယ်၊ ဘူးသီးတောင်မြို့နယ်အတွင်းမှာ ဗုဒ္ဓဟူးနေ့က မြန်မာ့တပ်မတော်နဲ့ ရခိုင်လူမျိုးစုလက်နက်ကိုင်အဖွဲ့ AA တို့အကြား တိုက်ပွဲဖြစ်ပြီး AA ရဲ့ ယာယီစခန်းငယ်တခုကို သိမ်းဆည်းရမိတယ်ဆိုတဲ့ တပ်မတော်ရဲ့ထုတ်ပြန်ချက်ကို AA ဘက်က ငြင်းပါတယ်။ ဒါ့အပြင် တနင်္ဂနွေနေ့က ဖုန်ညိုလိပ်ရွာ တိုက်ပွဲအတွင်း အရပ်သားတွေ ထိခိုက်သေဆုံးတာနဲ့ ပတ်သက်ပြီးတော့ လည်း နှစ်ဘက်ကြား အပြန်အလှန် စွပ်စွဲတာတွေ ရှိထားပါတယ်။ ဒီအကြောင်း ဗွီအိုအေ ထိုင်းအခြေစိုက်သတင်းထောက် နိုင်ကွန်းအိမ်က သတင်းပေးပို့ထားပါတယ်။

ဗုဒ္ဓဟူးနေ့က သရက်ပြင်ကျေးရွာ အရှေ့တောင်ဘက် မီတာ ၅၀၀၀ လောက်အကွာမှာ နှစ်ဖက်တိုက်ပွဲဖြစ်ပွါးခဲ့ကြောင်း ထုတ်ပြန်ချက်နဲ့ပက်သက်လို့ပြည်သူ့ဆက်ဆံရေးနှင့်စိတ်ဓာတ်စစ်ဆင်ရေးညွှန်ကြားရေးမှူးရုံး ဒုတိယ ညွှန်ကြားရေးမှူး၊ တပ်မတော် သတင်းမှန်ပြန်ကြားရေးအဖွဲ့ တွဲဘက် အတွင်းရေးမှူး ဗိုလ်မှူးချုပ်ဇော်မင်းထွန်းက ဗွီအိုအေကိုအခုလိုပြောပါတယ်။

“အဲဒီဥစ္စာသိမ်းတာကကျွန်တော်တို့သတင်းထုတ်ပြန်ထားတဲ့အတိုင်းဘဲ။ သူတို့စခမ်းဆိုပေမဲ့ယာယီစခမ်းဘဲ။ ခနနေ နေတဲ့စခမ်းလားမသိဘူး။ အဲဒီဟာလေးကိုသိမ်းခဲ့တယ်။ ထိခိုက်ဒဏ်ရာရမှုက ဟိုဖက်က ကျွန်တော်တို့ထုတ်ပြန်ထား တာ(၅)ယောက်ပေါ့။ ဟိုဖက်ကရော ဒီဖက်ကရောထိခိုက်ဒဏ်ရာရမှုတွေရှိပါတယ်။”

ရခိုင်ပြည်နယ် ဘူးသီးတောင်မြို့နယ် သရက်ပြင်ကျေးရွာဘက်မှာ ဇန္နာဝါရီ ၁၆ ရက်မနက်ဘက်က မြန်မာ့တပ်မ တော်နဲ့ ရခိုင့်တပ်မတော်တို့အကြား တိုက်ပွဲဖြစ်ပွါးခဲလို့ AA အဖွဲ့ဆီကနေ အလောင်းငါးလောင်း၊ သေနတ်နှစ်လက်နှင့် ဆက်စပ်ပစ္စည်းတွေကိုသိမ်းဆီးရရှိခဲ့တယ်လို့တပ်မတော်ဘက်ကနေ သတင်းထုတ်ပြန်ထားတာပါ။

ဒါပေမဲ့ ဘူးသီးတောင်မြို့နယ် သရက်ပြင်ကျေးရွာဘက်မှာ ဗုဒ္ဓဟူးနေ့က တိုက်ပွဲမဖြစ်ခဲ့ဘူးလို့ AA အဖွဲ့ ပြန်ကြားရေးတာဝန်ခံ ခိုင်သုခက ငြင်းပါတယ်။

“သူတို့ဒီ သတင်းအမှားတွေထုတ်ပြန်တယ်လို့ထင်ပါတယ်။ ဒါသတင်းအမှားဆိုတာထက်လုပ်ကြံသတင်းပေါ့လေ။ (၁၆)ရက်နေ့တနေ့လုံးက ဘာထိတွေ့တိုက်ခိုက်မှုမှမရှိဘူးဗျ။ အခုသူတို့ပြောတဲ့ဖြစ်စသ်ကကျွန်တော်ထင်ပါတယ်။ (၁၃)ရက်နေ့ကဖြစ်စဉ်ပေါ့နော်။”

အနီးနားရွာက ဒေသခံတဦးကလည်း ဗုဒ္ဓဟူးနေ့က သရက်ပြင်ကျေးရွာဘက်မှာ တိုက်ပွဲဖြစ်တာ မရှိတဲ့အကြောင်း ဗွီအိုအေကို ပြောပါတယ်။

“မရှိပါဘူး။ မရှိပါဘူး။ တခြားနေရာလဲမကြားဘူး။”

ပြီးခဲ့တဲ့ ဇန္နာဝါရီ(၁၃)ရက်နေ့က သရက်ပြင်ကျေးရွာဘက် တိုက်ပွဲအတွင်း လက်နက်ကြီးထိမှန်မှုကြောင့် ဖုန်ညိုလိပ်နဲ့ချာကေ ဘင်္ဂလီရွာသားတွေထိခိုက်သေဆုံးမှု ရှိခဲ့ပါတယ်။ အဲဒီဖြစ်စဉ်နဲ့ပတ်သက်လို့ တပ်မတော်နဲ့ AA တို့ကြား အပြန်အလှန် စွပ်စွဲ ပြောဆိုကြပါတယ်။

ရခိုင်တပ်မတော်ပြန်ကြားရေးတာဝန်ခံခိုင်သုခက တိုက်ပွဲဖြစ်စဉ်အတွင်း တပ်မတော်ဘက်က အထိနာခဲ့လို့ လက်နက်ကြီးနဲ့ ပစ်ခတ်တာကြောင့် ရွာသားတွေ သေဆုံးရတာလို့ဆိုပါတယ်။

“အဲဒီနေ့မှာ သူတို့ဘက်ကအကျဆုံးများတော့ လက်နက်ကြီးတွေနဲ့နေပြီးတော့ သူတို့နေရာအစုံကိုရမ်းသန်း ပစ်ခတ် နေတာတွေရှိတယ်။ တချို့လက်နက်ကြီးကျည်တွေက အနီးအနားဘင်္ဂလီကျေးရွာတွေကိုထိမှန်တာတွေရှိတယ်။ ဗမာ စစ်တပ်ကထုတ်ပြန်ချက်ထဲမှာပြောနေတဲ့ ယူနီဖေါင်းဝတ်အလောင်း(၅)လောင်းဆိုတာ အဲဒီ(၁၃)ရက်နေ့က သူတို့ လက်နက်ကြီးတွေနဲ့ပစ်လို့သေသွားတဲ့ဘင်္ဂလီရွာသားတွေရဲ့အလောင်းဖြစ်နိုင်တယ်။”

ဗိုလ်မှူးချုပ်ဇော်မင်းထွန်းကကတော့ AA အဖွဲ့ တိုက်ပွဲကဆုတ်ခွါစဉ်အတွင်း ပစ်ခတ်သွားတာလို့ပြောပါတယ်။

“ကျွန်တော်တို့တိုက်ပွဲဖြစ်တဲ့နေရာ အဲဒီသရက်ပြင် ဆိုတဲ့ရွာတောင်ဖက်မှာ ဖုန်ညိုလိပ်ဆိုတဲ့ရွာရှိတယ်။ ဖုန်ညိုလိပ် ရွာမှာ အဲဒီတိုက်ပွဲဖြစ်ပွါးနေစဉ်ကာလအတွင်းမှာ ဘင်္ဂလီ(၃၀)လောက် ပဲစိုက်ခင်းလုပ်နေတယ်။ အဲဒီအချိန်ဗျာ တယောက်ကတော့သေတယ်။ တယောက်ကတော့ဒဏ်ရာရတယ်။ သူတို့အားလု့းကိုမြေပြင်စစ်ဆေးကြည့်တဲ့အခါမှာ အဲဒီAAအဖွဲ့ဆုတ်လာရင်းနဲ့ သူတို့အဖွဲ့ကိုပစ်သွားတယ်ဗျ။ တယောက်ကသေတယ် တယောက်ကဒဏ်ရာရတယ်။ အဲဒီဒဏ်ရာရတဲ့သူဘူးသီးတောင်ဆေးရုံမှာရှိတယ်။”

မြန်မာ့တပ်မတော်နဲ့ AA အဖွဲ့တို့အကြား လက်ရှိ စစ်ရေးပဋိပက္ခအတွင်း တိုက်ပွဲဖြစ်ပွါးရာဒေသက ဒေသခံတွေဟာ လုံခြုံရေး အာမခံချက်ကင်းမဲ့နေတဲ့အခြေအနေမှာရှိနေပါတယ်။

အဲဒါကြောင့်လည်း ရသေ့တောင်မြို့နယ်အတွင်းက ကျေးရွာအုပ်ချုပ်ရေးမှူး အတော်များများ နုတ်ထွက်စာတင်ထားတယ်လို့ ပြည်သူ့လွှတ်တော်ကိုယ်စားလှယ် ဒေါ်ခင်စောဝေကပြောပါတယ်။

“အုပ်ချုပ်ရေးမှူးတွေပေါ့နော် ကျေးရွာ(၃၀)လောက်က သူတို့နှုတ်ထွက်စာတင်ဖို့ဆိုပြီးတော့ မြို့နယ်အုပ်ချုပ်ရေးမှူး ကို လာပြောတယ်လို့သိရပါတယ်။ ဒါပေမဲ့မြို့နယ်အုပ်ချုပ်ရေးမှူးကလဲ ချက်ချင်းကြီးနှုတ်ထွက်ဖို့ဆိုတာတော့ သူ့အ နေနဲ့ဌာနဆိုင်ရာကိုတင်ပြထားမယ်ဆိုပြီးတော့ သူပြောပြလိုက်တယ်လို့ကျွန်မတို့အဲဒီလိုဘဲသိထားရပါတယ်ရှင့်။ အခုဒီတိုက်ပွဲတွေဖြစ်နေတဲ့ကြားမှာ ကျေးရွာအုပ်ချုပ်ရေးမှုးတွေကိုပေါ့နော်။ သူတို့ကခေါ်ယူမေးမြန်းခြင်းတွေရှိတယ်။ နောက်တခါကျေးရွာအုပ်ချုပ်ရေးမှူးတွေအနေနဲ့လဲ ကျေးရွာကိုအုပ်ချုပ်တဲ့တာဝန်ကိုယူထားတဲ့အတွက် သူတို့က လာသမျှလူကိုကူညီပေးရတာတွေရှိပါတယ်။ အဲဒီထဲအခါကျတော့ ကျွန်မတို့မြန်မာနိုင်ငံရဲ့ဥပဒေထဲမှာလဲ ၁၇/၁။ ၁၇/၂တို့ဆိုတာရှိပါတယ်။ သူတို့လဲ ဒါမျိုးလေးတွေကိုဖြစ်လာမှာကိုလဲ သူတို့ကတွေးလာကြလိမ့်မယ်တူပါတယ်။”

နှစ်ဖက်စစ်တပ် လှုပ်ရှားရာနယ်မြေဒေသမှာ AA တပ်နဲ့ဆက်သွယ်တယ်ဆိုပြီး ဘူးသီးတောင်မြို့နယ် သရက်ပြင်ကျေးရွာ အုပ်ချုပ်ရေးမှူး အပါဝင် နှစ်ဦး၊ ရသေ့တောင်မြို့နယ်၊ ကြိမ်သာကျေးရွာသားနှစ်ဦးကို တပ်မတော်ကနေ ဖမ်းဆီးပြီး မတရားအသင်းဆက်သွယ်မှုပုဒ်မနဲ့ တရားစွဲဆိုထားပါတယ်။

ဒီဖြစ်စဉ်တွေနဲ့ပတ်သက်ပြီး AA အဖွဲ့အတွက် ဆက်ကြေးကောက်ခံပေးတာ၊ လုံခြုံရေး တပ်ဖွဲ့ဝင်တွေရဲ့ လှုပ်ရှားမှုကို စောင့်ကြည့်သတင်းပေးပို့တာတွေ စစ်ဆေးမေးမြန်း ဖော်ထုတ်သိရှိရလို့ တရားဥပဒေအရ အရေးယူနိုင်ရေးအတွက် လုပ်ထုံးလုပ်နည်းနှင့်အညီ ဆက်လက်စိစစ် ဆောင်ရွက်နေတယ်လို့ ဇန္န၀ါရီ(၁၆)ရက် နေ့မှာ တပ်မတော်ဘက်က သတင်းထုတ်ပြန်ထားပါတယ်။

EU ဆုံးဖြတ်ချက် မြန်မာ့ဆန်ပြည်ပတင်ပို့ရေး အခက်အခဲဖြစ်လာ

ဥရောပသမဂ္ဂ (EU) အနေနဲ့ မြန်မာနဲ့ ကမ္ဘောဒီးယားက တင်ပို့ရောင်းချနေတဲ့ အင်ဒီကာ (Indica) လို့ခေါ်တဲ့ ဆန်လုံးရှည် တင်ပို့မှု ကို အခွန်ကောက်ခံတော့မှာဖြစ်ပါတယ်။ မြန်မာနိုင်ငံအနေနဲ့ ဆန်စပါးထွက်နှုန်းနဲ့ ဆန်အရည်အသွေး ပိုမိုကောင်းမွန်လာပြီး နိုင်ငံတကာကို တင်ပို့ရောင်းချနိုင်အောင် ကြိုးစားနေချိန်မှာ အခုလိုအခွန်ကောက်ခံမှုဟာ မြန်မာနိုင်ငံအတွက် အခက်အခဲတစ်ခု ဖြစ်စေပြီး စိန်ခေါ်မှုတွေရှိလာတယ်လို့ မြန်မာနိုင်ငံ ဆန်စပါးအသင်းချုပ် အထွေထွေအတွင်းရေးမှူးက ပြောပါတယ်။ ဒီအကြောင်း ဗွီအိုအေ မြန်မာပိုင်းသတင်းထောက် ကိုကောင်းစံဟိန်းက ရန်ကုန်မြို့ကနေ သတင်းပေးပို့ထားပါတယ်။

မြန်မာနဲ့ ကမ္ဘောဒီးယားနိုင်ငံတွေကနေ တင်သွင်းနေတဲ့ အင်ဒီကာ ဆန်လုံးရှည်အပေါ် ဇန်နဝါရီလ ၁၈ ရက်၊ သောကြာနေ့ကစပြီး အခွန်ကောက်ဖို့ EU က ဗုဒ္ဓဟူးနေ့မှာ ဆုံးဖြတ်လိုက်တာပါ။

အင်ဒီကာ ဆန်လုံးရှည်အမျိုးအစားဟာ မြန်မာနိုင်ငံမှာ တန်ဖိုးမြင့် ဆန်အမျိုးအစားတစ်ခုဖြစ်ပါတယ်။ မြန်မာနိုင်ငံအနေနဲ့ နိုင်ငံတကာကို ဆန်တင်ပို့ရောင်းချမှုမှာ နိုင်ငံတကာကို ယှဉ်ပြိုင်နိုင်ဖို့ အဖက်ဖက်က ကြိုးစားနေတာဖြစ်တဲ့အတွက် အခုလို အခွန်ကောက်ခံလိုက်တာကြောင့် အခက်အခဲ စိန်ခေါ်မှုတွေနဲ့ ရင်ဆိုင်ရမှာဖြစ်တယ်လို့ မြန်မာနိုင်ငံ ဆန်စပါးအသင်းချုပ် အထွေထွေအတွင်းရေမှူး ဦးရဲမင်းအောင်က အခုလို ပြောပါတယ်။

” ဒီမြန်မာနိုင်ငံ အတွင်းမှာ ဆန်စက်တွေ ဖွံ့ဖြိုးတိုးတက်အောင် ရင်းနှီးမြှုံနှံမှုတွေ လုပ်ပီးတော့ ဆန်စက်တွေကို နိုင်ငံတကာ အဆင့်မီအောင် High quality ဆန်တွေတင်ပို့နိုင်အောင်ပေ့ါနော် လုပ်နေတဲ့အချိန်မှာ ဒီလိုအခက်အခဲတစ်ခု ကြုံတွေ့ရတာကတော့ ကျနော်တို့ဘက်က ယှဉ်ပြိုင်မှုကို ပိုကြိုးစားရမယ့်အနေအထား ဖြစ်သွားတာပေါ့နော်။”

အခုလို EU အနေနဲ့ အခွန်ကောက်ခံမယ်ဆိုရင် မြန်မာနိုင်ငံအနေနဲ့ တခြားနိုင်ငံတွေနဲ့ ယှဉ်ပြိုင်နိုင်အောင်ပိုကြိုးစားရရမယ်လို့ ဦးရဲမင်းအောင်က ပြောပါတယ်။

“တခြားနိုင်ငံတွေထက် ပိုပီးတော့ ကျနော်တို့က ဈေးနှုန်းအားဖြင့်သော်လည်းကောင်း၊၀န်ဆောင်မှုအားဖြင့်သော်လည်းကောင်း၊ Qualityအားဖြင့်သော်လည်းကောင်း စံချိန်စံနှုန်းပိုင်းတွေအရ ယှဉ်ပြိုင်ရမှပေါ့နော်။ကျနော်တို့ဘက်ကတော့ ယှဉ်ပြိုင်နိုင်တဲ့ အနေအထားဖြစ်အောင် ကျနော်တို့က အများကြီး ကြိုးစားရမှာပေါ့နော်။”

သုံးနှစ်ကြာ သွင်းကုန်ခွန်ကောက်ခံမယ့် အစီအစဉ်မှာ ပထမနှစ်အတွက် ဆန်တန်ချန် တတန်ကို ဒေါ်လာ ၂၀၀နီးပါး ၊ဒုတိယနှစ်မှာ ဒေါ်လာ ၁၇၀နီးပါး ၊တတိယနှစ်မှာတော့ ဒေါ်လာ၁၄၀ကျော် အသီးသီးကောက်ခံဖို့ ဥရောပသမဂ္ဂ ကုန်သွယ်ရေးကော်မရှင်ကပြောထားပါတယ်။

မြန်မာနဲ့ ကမ္ဘောဒီးယားနိုင်ငံတွေကို EU က GSP လို့ခေါ်တဲ့ ကုန်သွယ်မှု အထူးအခွင့်အရေး ပေးထားတဲ့အတွက် လက်နက်ခဲယမ်း ကလွဲပြီး တခြားကုန်ပစ္စည်းအားလုံးကို ဥရောပသမဂ္ဂအဖွဲ့ဝင်နိုင်ငံတွေကို တင်ပို့တာမှာ အခွန်ကင်းလွတ်ခွင့် ရထားတာပါ။ ဆန် အပေါ် အခွန်ကောက်ခံမယ့်ကိစ္စဟာ EU က မြန်မာနိုင်ငံကိုပေးထားတဲ့ GSP အခွင့်အရေးကို ပြန်ရုပ်သိမ်းဖို့ စဉ်းစားနေတာနဲ့ မဆိုင်ဘဲ ဆန်တင်ပို့တဲ့ တခြား ဥရောပအဖွဲ့ဝင်နိုင်ငံတချို့ဘက်က စောဒကတက် ပြောဆိုထားတဲ့အပေါ် EU က ဆန်းစစ်လေ့လာ ပြီး ဆုံးဖြတ်လိုက်တာဖြစ်ပါတယ်။

မြန်မာနိုင်ငံကနေ EU နိုင်ငံတွေကို တစ်နှစ်ကို အင်ဒီကာဆန်အပါအ၀င် ဆန်တန်ချိန်လေးသိန်းအထိ တင်ပို့ရောင်းချနေပါတယ်။ အခု အခွန်ကောက်မယ့်ထဲမှာ ဆန်ကွဲနဲ့ တခြားဆန်အမျိုးအစားတွေတော့ မပါပါဘူး။

၂၀၁၈ ဧပြီလကစပြီး ဒီဇင်ဘာလအတွင်း မြန်မာနိုင်ငံကနေ ပြည်ပနိုင်ငံတွေကို ဆန်တန်ချိန် ၁ ဒဿမ ၇ သန်းတင်ပို့ရောင်းချခဲ့ပြီး တရုတ်နိုင်ငံကို အဓိကထားတင်ပို့တယ်လို့ ပြည်တွင်းသတင်းတွေမှာ ဖော်ပြထားပါတယ်။

ခိုလှုံခွင့်ရှာနေတဲ့ တရုတ်အတိုက်အခံ ၂ ဦး

ကနေဒါနိုင်ငံမှာ ခိုလှုံခွင့်ရဖို့ စောင့်နေတဲ့ တရုတ်နိုင်ငံသား အတိုက်အခံ ၂ ယောက်ဟာ ထိုင်ဝမ် လေဆိပ်မှာ ရက်ပေါင်း ၁ဝဝ ကျော်ရှိသွားပြီဖြစ်ပေမယ့် လက်ခံတာ မရှိသေးဘူးလို့ သိရပါတယ်။

လျူဆင်းလျန်နဲ့ ယန်ကီဖန်တို့ဟာ ကနေဒါနိုင်ငံမှာ နိုင်ငံရေးခိုလှုံခွင့်ရဖို့ေ လျှာက်ထားပြီး အဲဒီအကြောင်းကိုလည်း လူမှုရေးကွန်ယက်စာမျက်နှာတွေကနေ တင်ပြနေပါတယ်။

အဲဒီ့ထဲက လျူဆင်းလျန်က အသက် ၆၄ နှစ်ပြည့် မွေးနေ့ကို ထိုင်ဝမ်လေဆိပ်ထဲမှာကုန်ဆုံးခဲ့ပြီး သူတို့အနေနဲ့ လေဆိပ်ထဲမှာနေရတာ လေကောင်းလေသန့် မရတော့သလို နေရောင်ခြည်မရတာလည်း ကြာပြီလို့ ဆိုပါတယ်။

ထိုင်ဝမ်နိုင်ငံမှာ ကုလသမဂ္ဂဒုက္ခသည်များဆိုင်ရာမဟာမင်းကြီးရုံး မရှိသလို သူတို့ကိစ္စအတွက် နိုင်ငံတကာရဲ့အာရုံစိုက်မှု အားနည်းနေတယ်လို့ သိရပါတယ်။

– ကနေဒါနိုင်ငံမှာ ခိုလှုံခွင့်ရဖို့ ကြိုးစားနေတဲ့ လျူဆင်းလျန် နဲ့ ယန်ကီဖန်။
Photo: Courtesy of Yan Kefen / AFP

သီရိလင်္ကာက ဒီနှစ်ထဲ ကန်ဒေါ်လာသန်းငါးထောင်ကျော် တရုတ်ကို ပြန်ဆပ်ရမယ်

သီရိလင်္ကာနိုင်ငံကို တရုတ်ဘဏ်က ကမ်းလှမ်းထားတဲ့ အမေရိကန်ဒေါ်လာ သန်း ၃ဝဝ ချေးငွေကို ယူမယ်၊ မယူဘူးဆိုတာ ဆုံးဖြတ်ဖို့ စဉ်းစားနေတယ်လို့ သီရိလင်္ကာဘဏ္ဍာရေးဝန်ကြီးဌာနက ပြောလိုက်ပါတယ်။

အဲဒီကိစ္စအတွက် အဖွဲ့ဝင် ၃ ဦးပါတဲ့ ကော်မတီကို အစိုးရက ဖွဲ့ပေးထားတယ်လို့ နိုင်ငံခြားရေးဌာန ပြောခွင့်ရသူ ဟာဆန်က ပြောပါတယ်။ အခုချေးငွေကို ၃ နှစ်အတွင်း ပြန်ဆပ်ရမှာဖြစ်ပါတယ်။

အရင်ကရှိပြီး ချေးငွေတွေအတွက် ဒီနှစ်အတွင်း သီရိလင်္ကာနိုင်ငံဟာ တရုတ်ကို အမေရိကန်ဒေါ်လာ သန်း ၅၉ဝဝ ပြန်ဆပ်ရမှာ ဖြစ်ပြီး၊ အခုသီတင်းပတ်မှာ သန်း ၁ဝဝဝ ပြန်ဆပ်လိုက်ပါတယ်။

သီရိလင်္ကာနိုင်ငံဟာ တရုတ်ရဲ့ ခေတ်သစ်ပိုးလမ်းမစီမံကိန်းကြီးအတွက် အဓိကကျနေတဲ့နိုင်ငံ ဖြစ်ပါတယ်။

Photo: AFP
– သီရိလင်္ကာနိုင်ငံမှာ တရုတ်ချေးငွေနဲ့ တည်ဆောက်နေတဲ့ ကိုလံဘို ကုန်တင်ကုန်ချ ဆိပ်ကမ်း။

ဆော်ဒီမိန်းကလေးကို ကနေဒါက လုံခြုံရေးငှားပေးထား

ကနေဒါနိုင်ငံက ခိုလှုံခွင့်ပေးလိုက်တဲ့ ဆော်ဒီမိန်းကလေး အယ်လ်ကွန်နန်ကို ခြိမ်းခြောက်တာတွေ ရှိနေတဲ့အတွက် တိုရွန်တိုမြို့ ဒုက္ခသည်ကူညီရေးအဖွဲ့က သူ့အတွက် သီးသန့်လုံခြုံရေးတယောက် ငှားပေးထားတယ်လို့ အဖွဲ့ရဲ့ ညွှန်ကြားရေးမှူးချုပ်က ပြောလိုက်ပါတယ်။

သူ့ကို အင်တာနက်အွန်လိုင်းကနေ နည်းမျိုးစုံနဲ့ ခြိမ်းခြောက်တာတွေ ရှိနေတယ်လို့ ဒုက္ခသည်ကူညီရေးအဖွဲ့ အကြီးအကဲက ပြောပါတယ်။ ဒါကြောင့် သူ့ကို ဘယ်တော့မှ တယောက်တည်းထားမှာ မဟုတ်ဘူးလို့ ဆိုပါတယ်။

ထွက်ပြေးဖို့ ကြိုးစားကြတဲ့ အမျိုးသမီးတွေထဲမှာ ကံမကောင်းတဲ့သူတွေ အများကြီးရှိတယ်ဆိုတာ သူ့အနေနဲ့ သိပါတယ်၊ သူကတော့ ကံကောင်းတဲ့သူပါပဲလို့ အယ်ကွန်နန်က ပြောပါတယ်။

မိသားစုက အဓမ္မအိမ်ထောင်ချပေးတာကို လက်မခံဘဲ ထိုင်းနိုင်ငံကို ထွက်ပြေးလာပြီး နိုင်ငံတကာရဲ့ အကူအညီရှာခဲ့တဲ့ အယ်လ်ကွန်နန်ကို ကနေဒါက လက်ခံခဲ့တာ ဖြစ်ပါတယ်။

Photo: Reuters

ဂျပန်ကို ၂ဝ၁၈ မှာ ကမ္ဘာလှည့် ၃၁ သန်းကျော် လာရောက်ခဲ့

ဂျပန်နိုင်ငံကို ပြီးခဲ့တဲ့ ၂ဝ၁၈ ခုနှစ်အတွင်း ကမ္ဘာလှည့် ခရီးသည်ဦးရေ ၃၁ သန်းကျော် လာရောက်လည်ပတ်ခဲ့တဲ့အတွက် အရင်နှစ်ကထက် ၈.၇% ပိုများပြီး စံချိန်တင်ခဲ့တယ်လို့ ဂျပန်အမျိုးသား ပြည်ပခရီးသွားဆိုင်ရာအဖွဲ့က ဒီကနေ့ ကြေညာပါတယ်။

ဂျပန်ကိုလာရောက်တဲ့ နိုင်ငံခြား ခရီးသွားတွေထဲမှာ တရုတ်နိုင်ငံသား ၈ သန်း၊ တောင်ကိုရီးယားနိုင်ငံသား ၇ သန်းခွဲနဲ့ ထိုင်ဝမ်နိုင်ငံသား ၅ သန်းနီးပါး ပါဝင်ပါတယ်။ အဲဒီ နိုင်ငံခြားသားတွေ ဂျပန်နိုင်ငံမှာ လှည့်လည်သွားလာစဉ်အတွင်း သုံးစွဲခဲ့တဲ့ငွေကြေး ပမာဏက ကန် ဒေါ်လာ ၄၁ ဘီလီယံခွဲ ရှိပြီး တရုတ်နိုင်ငံသားတွေက သုံးစွဲမှုအများဆုံးဖြစ်တယ်လို့လည်း သိရပါတယ်။

Photo: KAZUHIRO NOGI / AFP

တောင်တရုပ်ပင်လယ်မှာ ကန် နဲ့ ဗြိတိန် စစ်ရေးလေ့ကျင့်

သူပိုင်-ငါပိုင် အငြင်းပွားနေတဲ့ တောင်တရုတ်ပင်လယ်မှာ တရုတ်နိုင်ငံက ကျွန်းတွေလုပ်ချိန်ကစလို့ အမေရိကန်ပြည်ထောင်စုနဲ့ ဗြိတိန်နိုင်ငံတို့ ပထမဆုံးအကြိမ် ရေတပ် ပူးတွဲစစ်ရေးလေ့ကျင့်ပါတယ်။ တရုတ်နိုင်ငံကို ဖိအားဆက်ပေးဖို့ မဟာမိတ်တွေ အကူအညီကို အမေရိကန်ကရယူဖို့ ကြိုးပမ်းချိန်မှာ လေ့ကျင့်တာလည်းဖြစ်ပါတယ်။

ဂျပန်မှာစခန်းချတဲ့ အမေရိကန် ပဲ့ထိန်းဒုံးတပ် ဖျက်သင်္ဘောနဲ့ အာရှမှာ ခရီးလှည့်နေတဲ့ ဗြိတိန်တော်ဝင် ရေတပ်စစ်သင်္ဘောတို့ဟာ ဘုံလုံခြုံရေးဦးစားပေးကိစ္စ ကိုင်တွယ်ဖြေရှင်းဖို့ သောကြာနေ့က ဒီနေ့ထိ ဆက်သွယ်ရေးနဲ့ တခြားစစ်ရေးလေ့ကျင့်ခန်း ပူးတွဲလေ့ကျင့်ကြပါတယ်။

တောင်တရုတ်ပင်လယ်မှာ ၂၀၁၀ ပြည့်နှစ်ကစလို့ ဒီလို ပူးတွဲစစ်ရေးမလေ့ကျင့်ခဲ့ဖူးဘူးလို့လည်း အမေရိကန် ရေတပ်က ထုတ်ပြန်တဲ့ကြေညာချက်မှာ ပါရှိပါတယ်။

တောင်တရုတ်ပင်လယ်က တရုတ်ပိုင်တယ်လို့ပြောတဲ့ Paracel ကျွန်းစုတွေနား တခြား ဗြိတိန်စစ်သင်္ဘော သြဂုတ်လက ခုတ်မောင်းခဲ့ပြီးတဲ့ ခု နှစ်နိုင်ငံ စစ်ရေးလေ့ကျင့်တာပါ။

မဟာဗျူဟာကျတဲ့ ရေလမ်းကြောင်းကို တရုတ်က ပိုထိန်းချုပ်လာတာနဲ့ နိုင်ငံတကာကပိုမိုပါဝင်ဖို့ အမေရိကန်က ပြောပြီးတဲ့နောက် တရုတ်ကို ဗြိတိန်က ပထမဆုံးအကြိမ်တိုက်ရိုက် စိန်ခေါ်တာလည်းဖြစ်ပါတယ်။ ဒါကို ဗြိတိန်ကရန်စတယ်လို့ တရုတ်က စွပ်စွဲပါတယ်။

ဒီလို တရုတ်နိုင်ငံက စစ်အင်အားကြီးထွားလာကို အမေရိကန်က စိုးရိမ်မကင်းဖြစ်ရတဲ့ အစီရင်ခံစာတစ်စောင်ကိုလည်း ပင်တာဂွန်စစ်ဌာနချုပ်က မနေ့က ထုတ်ပြန်ပါတယ်။ ထိုင်ဝမ်ကို တရုတ်ကို တိုက်ခိုက်မယ့်အလားအလာရှိတာကို စိုးရိမ်ရတဲ့အကြောင်း ဖော်ပြထားပါတယ်။

Photo: AFP

Latest News For You